U kúuchil Centro de Justicia para la Mujer de Carmen táan u máan u beet xaak’alo’ob ti’al u yojéeltik tu beel ba’ax úuchij, tumen ku tukulta’ale’ yanchaj juntúul paal beeta’ab u yóol ichil Casa Hogar “San Pedro Pescador”, beey tu ya’alaj máax jo’olbesik Procuraduría de Niñas, Niños y Adolescentes del DIF, Gabriela López Sánchez.
“Yaan máax táan u chíikbesiko’ob tu kúuchil Centro de Justicia para la Mujer, tumen ti’ j ts’a’ab k ojéelt ba’ax táan u yúuchili’. Teen xane’, tin wa’alaj je’el in wáantik jo’olpóopo’ob ti’al le xaak’al ku beetiko’obo’. Ma’ táan u páajtal k a’alik uláak’ ba’al ti’ le ts’o’ok k ts’áak ti’obo’”.
También te puede interesar: CJM investiga presunto caso de violación en casa hogar de Carmen
Beyxan tu ya’alaje’, ikil láayli’ u xak’alta’al ba’ax ucha’ane’, unaj ma’ u ya’alal mix ba’al ti’al ma’ k’askúunta’al meyaj ku taal u beeta’al tumen jo’olpóopo’ob.
Ti’ tak pool táan u sutulsuut ti’ reedes sosialese’, ku xo’okole’, le paal máax beeta’ab u yóolo’, máata’ab tumen Rocío M. yéetel Mateo T., te’e k’inako’obe’ 10 u ja’abil, ts’o’okole’ ti’al 2018 ka láaj úuch le ba’ala’, sexual loobilta’ab tu kúuchil Casa Hogar “San Pedro Pescador”, tumen Salvador N., u yíicham x kanan paal Lupita N.
Ku ya’alale’, x kanan paal Lupita N. u yojel ba’ax táan u beeta’al ka’ach ti’ le x ch’úupalo’, tumen biinsa’ab kajtal yéetel u yíicham Mateo N, beyxan u paalal Luis Ángel yéetel Julián, máaxo’ob láayli’ tu beetajo’ob u yóol ti’ le x ch’úupalo’.
Ichil ba’ax a’alab tumen u yuumo’ob le x ch’úupalo’, leti’e’ tu tsikbaltaj bin ti’ máax jo’olbesik Casa Hogar “San Pedro Pescador”, yaan máax beetik u yóol ti’ Ba’ale’ tak walkil ts’o’ok u yantal 13 u ja’abile’, leti’ ka ojéelta’ab ba’ax beeta’ab ti’, úuchik u tsikbaltik ti’ Laydi N., máax beetik u sikoologail le kúuchilo’, máax tu ts’áaj k’ajóoltbile’ yaan ba’ax ma’ no’ojan táan u yúuchuli’, le beetik yanchaj u ts’áak u yojéelt Procuraduría de Niñas, Niños y Adolescentes ti’ u mola’ayil DIF, tu’ux táan u láaj beeta’al xaak’alo’obi’.
Ichil le tak poolo’, j ts’a’ab ojéetbil tumen le x ch’úupal loobilta’ano’, yaan bin uláak’ x ch’úupalal ichil 14 yéetel 16 ja’abo’ob láayli’ u beeta’al u yóolo’ob tumen le máako’oba’.
Xak'alutskíinsa'an tumen: Sasil Sánchez Chan
