Le martes máanika’ k’aab’ainta’ab Mary Simon beey u jéeneral jala’achil Canadá. Ba’ax jets’a’abe’ k’a’anan ti’al u “k’ajla’ay”, tumen leti’e’ yáax máasewal wíinik táan u p’áatal u beet le meyajilo’, le beetik “noj ba’al ti’al u káajal u k’exa’al ba’al”.
Simone’ yaan u chíikbesik x ajaw Isabel II te’e noj lu’umo’, ba’ale’ beyxan leti’ kun p’áatal xan beey jefa de Estado, tumen ook tu jeel Julie Payette, máax tu p’ataj le meyajilo’ tu winalil enero, úuchik u jach yantal u t’aanil tumen jach bin ts’íik yéetel ma’ tu p’atik u paach máaxo’ob ku meyaj yéetel, beyxan tumen yanchaj u x wo’okinil úuchik u ts’a’abal k’ajóoltbil jump’éel tsool meyajil tu’ux xoka’abe’, jo’olbesaj meyajil ku beetike’ ich “jela’an óol” yéetel “k’eeyajil” u beetik.
También te puede interesar: Líder inuit, primera gobernadora general indígena de Canadá
Tu jo’oloj maanal wakp’éel winalo’obe’, máax beetik u yáax ministro canadaile’, Justin Trudeau, tu ya’alaj ti’ k’a’aytajil tsikbale’, x ajaw Isabel II ts’o’ok u éejentik ka p’áatak Simon ti’ le meyajila’, beey úuchik u chíikbesa’al tumen u kúuchil cha’a CBC.
Simone’ tu jo’olbesaj u moala’yil inuit kaaj, Inuit Tapiriit Kanatami, ts’o’okole’ ku meyaj xan ti’ kúuchilo’ob k’a’aytik péektsilo’ob, yéetel u ts’áamaj u yóol ti’al u ba’atel yóok’lal u páajtalil máasewal kaajo’ob.
Ka’aj ts’o’ok u jets’a’al u beetik u x jala’achile’, Simone’ tu ya’alaj ba’ax táan u yúuchule’ “k’a’anan yéetel ku beetik u yantal alab óol ti’ u lu’umil Canadá”, beyxan “noj xáak’ab le táan u yantal ti’ chowak bej yaan ti’al u yutstal u yóol kaaj”.
U je’ets’el Simone’ ku núup’ul xan yéetel túumben kaaxanilo’ob ts’o’ok u yantal ti’ kúuchilo’ob tu’ux ku yúuchul kaambal ka’achil, ikil ila’ab u jejeláasil muukulilo’ob -tak walkila’ xoka’ab mil 148i’-, ts’o’okole’ le je’elo’ tu péeksaj u yóol kaaj yéetel tu beetaj u yantal máax líik’sik u t’aan ti’al u k’áata’al ka chíimpolta’ak u páajtalil máasewal kaajo’ob.
Beyxan le je’ela’ táan u yúuchul ka’alikil ma’ili’ jets’a’ak tumen Trudeau wa unaj u yantal yéeytambal te’e ja’aba’ ti’al u kaxtik ka jeel ya’abak u máakilo’ob yaan ichil páarlamentóo, ba’ale’ leti’e’ tu ya’alaje’ ma’ bin u tsikbalt yéetel Simoni’. Wa tumen ka k’uchuk beetbil yéeytambale’, ti’ Simon kun p’atbil u meyajil u ts’o’okbes u jaats k’iinil meyajo’ob le léejislaturao’.
Xak'alutskíinsa'an tumen: Sasil Sánchez Chan
