Te’e viernes 16 ti’ julioa’ táan u káajal u ts’a’abal báakunáa tu méek’tankaajil Ciudad del Carmen ti’al máax u ja’abil ichil 30 tak 39, beyxan ti’al máaxo’ob maanal u ja’abil ti’ le je’elo’, ts’o’okole’ ma’ páatchaj u ts’a’abal u yáaxakil báakunail Covid-19. Táan u tukulta’ale’ yaan u ts’a’abal kex ti’ 32 mil u túul máak, beey tu ya’alaj máax jo’olbesik Programas para el Bienestar, Vicente Guerrero del Rivero. ti’ le baantao’.
Leti’e’ tu ya’alaje’, yaan u ts’a’abal tu k’iinil viernes 16, sábado 17 yéetel lunes 19 ti’ julioa’ ti’ máax j ts’a’ab u siita tumen u meyajnáalilo’ob Secretaría del Bienestar yéetel ts’íibta’ab u k’aaba’ ti’ le tsoolil beetchajo’. Ti’al túun 20 ti’ julio, yana u ts’a’abal ti’ tuláakal máax ma’ t’ana’abi’, ti’al beyo’ ma’ u p’áatal mixmáak wa mina’an u ti’ali’.
También te puede interesar: Este viernes inicia la vacunación a mayores de 30 años en 'Carmen'
Báakuna kun ts’a’abil ti’ le kaajo’, leti’e’ beeta’an tumen Astra Zeneca, ts’o’okole’ ti’ kun beetbil tu kúuchil Domo del Mar, tu baantail Playa Norte.
“Táan k tukultike’, ichil xookil beeta’ab ti’al u yojéelta’al jaytúul kajnáalo’ob yaan úuchik u na’aksa’al ti’ pláataformae’, ila’abe’ tu noj kaajil Carmene’ yaan óoli’ 32 mil u túul máak yaan u ja’abil ichil 30 tak 39, máax ti’ yaan u páajtalil u ts’a’abal ti’ob le báakunao’”.
Beey túuno’, táan u tukulta’ale’ sáansamal yaan u ts’a’abal óoli’ 8 mil u p’éel báakuna, le beetike’ ti’ k’áataj ti’ kaaj ma’ u chi’ichnaktal wa ma’ táan u jáan ts’a’abal ti’ yéetel ma’ u seen much’talo’ob te’e kúuchilo’.
Ti’al nojoch máak
Guerrero del Rivero tu ya’alaje’ láayli’ beey kéen ts’a’abak u báakunail ti’ máax ts’o’ok 40 u ja’abile’, ts’o’okole’ ma’ béeychaj u k’amiko’ob u yáax jaatsil le ts’aako’ yéetel ti’ yaano’ob ichil máaxo’ob “p’ata’an paachil”, le beetike’, unaj u bino’ob yéetel u kréedensial elektóoril.
“Táan k tukultike’ beey kéen káajak k xíimbalt mejen kaajo’ob, ti’al beyo’ u páajtal u ts’a’abal báakuna ti’ máaxo’ob p’ata’anob paachil yéetel yaan u ja’abil ichil 50 tak 59; 40 tak 49 ja’abo’ob, yéetel walkila’, tak máax yaan u ja’abil ichil 30 tak 39, ba’ale’ ma’ je’ets’ek bix kéen beeta’aki’, mix xan ba’ax k’iino’obi’”.
Xak'alutskíinsa'an tumen: Sasil Sánchez Chan
