U meyajnáalil Programas del Bienestar ti’ u jala’achil u noj lu’umil Méxicoe’, Arturo Abreu Marín, tu ya’alaje’ ma’ táan u tukulta’al u k’ujsa’al u nu’ukbesajil Gas del Beienestar tak tu péetlu’umil Quintana Roo, tumen tak walkila’, chéen tu’ux yaan óotsil kaajo’ob kun biinsbil; ba’ale’, le bajux ku tojoltik gas LP yaan u chan éemel tak yóok’ol u 25 % úuchik u je’ets’el tumen Comisión Regulatoria de Energía (CRE) bajux u tojoltik jump’éel kilograamo yéetel jump’éel litro.
Tak walkila’, tu ya’alaj, mina’an mix ba’al a’alik wa yaan u ts’a’abal u páajtalil u yokol meyaj u gaserasil Bienestar tu péetlu’umil Quintana Roo, chéen ba’ax jeets’ele’, yaan u páajtal u yantal le nu’ukbesaja’ ti’ kaajo’ob tu’ux jach talam yanik u kuxtal kaaj yéetel óotsilil.
También te puede interesar: Gas Bienestar no llegará a Quintana Roo por ahora
“Míin chéen ti’ noj kaajo’ob kun ts’áabil le nu’ukbesaja’, je’el bix Playa del Carmen wa Cancún; ma’ a’alak to’on uláak’ wa ba’ax yóok’lali’, chéen ba’axe’ kin tukultik ma’ táan u béeytal u ts’a’abal u jeel le mola’ayo’ob konik gas tu péetlu’umil Quintana Roo, tumen u ya’abile’ mola’ayo’ob ku meyajo’ob ti’ u noj lu’umil México, ts’o’okole’ u ya’abil ti’ le ku k’a’abéetkunsa’alo’, leti’e’ k’ajóolta’an beey gas estacionario”, tu ya’alaj Abreu Marín.
Jejeláas le bajux ku tojoltik Gas LP, yaan ba’al u yil tu’ux kaajil ku ma’anal; je’el bix, tak le lunes máaniko’, u mola’ayil Gas Tomzae’ ku konik a 13.15 pesos u litroil tu méek’tankaajilo’ob Felipe Carrillo Puerto yéetel José María Morelos, ka’alikil Othón P. Blancoe’ ku tojoltik 11.77, yéetel Bacalare’, 12.64; tu méek’tankaajil Benito Juárez, Puerto Morelos, Solidaridad yéetel Tulume’ ku tojoltik 11.84 pesos u litroil.
Mola’ayo’obe’ tu jets’ajo’ob jump’éelili’ u tojol, le lunes máanika’, úuchik xan u je’ets’el u mokt’aanil A/024/2021 beeta’an tumen Comisión Reguladora de Energía, tu’ux ku ya’alal unaj u je’ets’el beyka’aj u jach ko’ojil kun konbil u gasil petroleeo likuarta’an, leti’e’ ku ko’onol ti’ máak. Jeets’ile’ beeta’ab ti’al u kaláanta’al ba’axs unaj u yantal ti’ máaxo’ob k’a’abéetkunsik.
Tak le p’iis k’iinil máaniko’, tu mée’tankaajil Othón P. Blancoe’ ku ko’onol a 28.33, 28.19 wa 27.08 pesos u kilograamoil, lalaj mola’ay u jets’maj beyka’aj u tojol, ba’ale’ úuchik u beeta’al, mokt’aane’, unaj 21.79 pesos u tojol; u k’áat u ya’ale’, éem ichil 23 yéetel 25 por siientoi’.
CREe’ u éejentmaj u tojol jump’éel u kilograamoil gas beya’: 24.35 pesos ti’al le ku ko’onol Felipe Carrillo Puerto yéetel José María Morelos; 21.79 ti’al le ku ko’onol Othón P. Blanco; 23.41, Bacalar; 21.92, Isla Mujeres, Solidaridad, Tulum, Benito Juárez yéetel Puerto Morelos; 24.02 ti’al le ku ko’onol Lázaro Cárdenas yéetel 23.63 tu méek’tankaajil Cozumel.
Beey túuno’, yóok’lal Gasolineras del Bienestare’, Abreu Maríne’ tu ya’alaj ts’o’ok u yojéeltike’, yaan jump’éel kun ts’a’abil tu noojolil le péetlu’umo’, ba’ale’ ma’ páatchaj u ya’alik uláak’ ba’ax yóok’lali’.
Xak'alutskíinsa'an tumen: Sasil Sánchez Chan
