Chéen ti' winal yaniko'ona', Fiscalía General del Estado de Campeche (Fgecam), u p'atmaj ets'tal waxakp'éel xaak'al unaj u beetik ti'al u sáasilkunsik bix úuchik u kíinsa'al le jaytúul máako'ob xan tu méek'tankaajilo'ob Champotón, Candelaria yéetel Carmen. Ba'ale', tak walkila', mixba'al ojéela'an yóok'lal ba'ax úuchij, mixmáak macha'ak tumen, yéetel ichil máaxo'ob kíinsa'ane' ti' yáan juntúul u yuumil mola'ay, paalal yéetel tak juntúul x jo'olbesajil ko'olel yaan.
Ichil ba'ax a'alan tumen u jala'achil le lu'umo', Kaanpeche' leti'e' péetlu'um tu'ux u jach “p'íitil sajbe'entsil yaan”, ba'ale' jo'olpóopo'obe' ich "u pixmajo'ob" ba'ax táan u beetiko'ob ti'al u sáasilkunsa'al ba'ax úuchij, ts'o'okole' tak bejla'a' u tsikbalta'al te'e' kaajo'obo' ba'ax úuchij, ts'o'okole' kajnáalo'obe' ku tukultiko'ob sajbe'entsil le kaajo'ob je'elo'.
También te puede interesar: En lo que va de agosto, ocho homicidios en Campeche
Yáax xaak'ale' je'eb tu k'iinil 2 ti' agosto, úuchik u kaxta'al u kimen wíinkilal ka'atúul u ajmeyajilo'ob u beeta'al najo'ob, yóok'ol u bejil ku bin Champotón tak Escárcega, beyxan yanchaj uláak' jump'éel wíinkilal kaxta'ab ti' jump'éel yáam bej ti' u noj bejil Champotón-Carrillo Puerto, naats' ti' u kaajil Ulumal. Chika'an tu yóoxp'éel wíinkilalo'obe' yáax loobilta'ab ts'o'okole' j ts'o'ono'ob ti'al u ts'a'abal u ts'ook ti'obi'.
U k'iinil sábado 7 ti' agostoe', le k'iin beeta'ab U Wakp'éel Tsoolmeyajil Jala'ache', ojéelta'ab kíinsa'anb Jorge Ismael Hernández Hol, 23 u ja'abil, beyxan Luis Alejandro Rodríguez, 22 u ja'abil, tu ka'atúulal síijo'ob Guatemalai'. U yóoxtúul máax kíinsa'abe' Isaías Pérez, ts'o'oko'ole' Sofía Juliette González Á., juntúul x ch'úupal 13 u ja'abil máax síij tu kaajil “Estrella del Sur”.
Yanchaj uláak' juntúul x ch'úupal láayli' 13 u ja'abile' Cecilia U. G., máax loobilta'abij ts'o'oke' chéen ojéela'an jach sajbe'entsil yanil u kuxtal yéetel ti' oksa'an tu kúuchil ts'akyaj Candelariai'.
U ts'ook kiinsajil úuche', úuch ti' jump'éel k'áax p'aatal ichil "La Beraca” yéetel u kaajil San Juan, tu baantail Chumpán, ti' u méek'tankaajil Carmen, tu'ux k'uch kiinsaj máako'ob ti'al u ts'áako'ob u ts'ook ti' Lea Juárez Valenzuela. Ka'atéen úuchik u ts'o'onol. Ukp'éel kiloometros náachil ti' u bejil ku bin tak Santa Rita, ts'o'oke' úuch xan tu k'iinil sábado 7, ba'ale' u wíinkilale' líik'sa'ab tak tu jo'oloj domingo 8i'.
Xak'alutskíinsa'an tumen: Sasil Sánchez Chan
