“U jala’achil u lu’umil Méxicoe’ tu jets’aj Tren Mayae’ ma’ táan u yokol tu noj kaajil Jo’”, beey tu ya’alaj jala’ach Mauricio Vila. Le je’ela’, tu ya’alaj, tumen le éestasion táan ka’ach u beeta’al tu k’áaxil La Planchae’ ma’ yantal walkila’.
Tu súutukil úuchik u k’a’ayta’al túumben Estadio Sostenible de Yucatán (ESY), jala’ache’ tu ya’alaj Trene’ yaan ka’ach u tséelel jump’íit aantes u k’uchul Jo’, le beetik yaan u je’elel tu’ux yaan Teya, u méek’tankaajil Kanasín.
Vila Dosale’ tu ya’alaj le p’isk’iinil máaniko’, tu much’ajubáaj yéetel máax jo’olbesik Fondo Nacional de Fomento al Turismo (Fonatur), Rogelio Jiménez Pons ti’al u ka’a a’alik ti’e’ yaan u yóol meyaj ti’al u beeta’al jump’éel nojoch paarkée tu k’áaxil La Plancha.
También te puede interesar: El Tren Maya ya no contará con estación en Mérida: Vila Dosal
“Ma’ in k’áat ka p’a’atak chéen beyo’, táan k kaxtik bix je’el u beetchajale’. Ma’ táan u xáantal k t’an múul meyaj uláak’ k’a’anan máako’ob ti’ kaaj, beyxan u áayuntamientoil u jaajil Jo’ ti’al k múul ikil ka yanak le nojoch paarkeo’ te’e tu’ux yaan La Planchao’”, tu ya’alaj.
Ka’aj t’aanaj u jo’opóopil Jo’e’, Renán Barrera Concha, tu ya’alaj k’a’anan u káajal u xak’altukulta’al bix kéen beeta’ak le meyajo’, tumen le k’áax je’elo’ ti’alinta’an tumen u lu’umil México. Le beetik tu sáasilkúunsaje’ Tren Mayae’ je’el u yutstal u yokol Jo’.
“Ma’ tu yokol jach La Planchai’, ba’ale’ je’el u béeytal ti’ beel ku núup’ul Umán beyxan Teya, leti’e’ tu’ux ts’o’ok u yojéelta’al tak walkila’”, tu ya’alaj.
Fonature’ tu jets’aj
Ma’ xáanchaj k’a’aytak tumen Vila Dosal le k’eexilo’, ka’a jets’a’ab tumen Fonatur k’eexilo’ob beeta’ab ti’ u meyajil Tren Maya tu kaajil Jo’; ts’o’okole’ ts’o’ok u je’ets’el ma’ táan u káajsa’al u líik’sa’al u éestasionel jets’a’an yaan u beeta’al ka’ach tu k’áaxil La Plancha tumen yaan u ts’a’abal Teya.
“Ba’ax je’ets’e’ beeta’ab tumen úuchik u xak’alta’al u k’a’ananil u ts’o’okol meyaj je’el bix tukulta’ane’, yanchaj u k’e’exel u beel, tumen táan u yila’al ma’ u xantal mix ba’al kéen jo’op’ok u beeta’al mix xan bix u péek ba’al ich le noj kaajo’”, beey ts’a’ab te’e k’a’aytajil ts’íibo’.
Xak'alutskíinsa'an tumen: Sasil Sánchez Chan
