Tumen ts’o’ok u beeta’al páayt’aan jejeláas k’iino’ob yéetel tumen ts’o’ok xan u yojéeltik Tribunal Unitario Agrario (TUA) ti’ u lu’umil Kaanpeche’ ts’a’ab u díirexionil najo’ob mina’ano’obe’, Pedro Celestino May Cane’ tu ya’alaj tríibunale’ ts’o’ok u túuxtik t’anbil Carlos Mouriño Atanez, máax ti’alintik Grupo Energético del Sureste (GES) beyxan u yuumil u kúuchil Campeche Country Club, yéetel le uláak’ 16 u túul majank’aaba’ob meyajnajo’ob ti’al máax tu beetaj u jala’achil u péetlu’umil Veracruz, Javier Duarte de Ochoa, le beetike’ éejidatario’obe’ táan u alab óoltiko’ob u su’utul ti’ob maanal ti’ 9 mil 600 ektaareas, táaka’an ka’ach ichil u éejidoil Lerma, tak ka’aj ma’ano’ob kex ma’ patal úuchik u beeta’ali’.
Éejidatarioe’ tu ya’alaj máaxo’ob táaka’an u poolo’obe’ yáax t’ana’abo’ob tu k’iinil 15 yéetel 16 ti’ abril ti’ le ja’aba’, ba’ale’ mix juntúul bini’; ti’al u le je’elo’ t’ana’an xan Carlos Mouriño Atanez ti’al u chíikbesikubáaj tu táan u jala’achilo’ob u lu’umil México, tumen beyo’ yaan ka’ach u páajtal u luk’sik je’el ba’axak kuuch táan u ts’a’abal tu yóok’ol, tumen kex tumen ts’o’ok wakp’éel ja’abo’ob káajak u yantal u ba’atelil le k’áaxa’, Mouriño Ataneze’ ma’ t’ana’an ka’achili’.
También te puede interesar: Ejidatarios de Lerma, esperanzados de recuperar tierras
Le beetike’, May Cane’ tu ya’alaje’ TUAe’ tu jets’aj ti’ xaak’almeyaj ku beetike’, máaxo’ob t’ana’an, je’el bix Antonino Almazán Arteaga yéetel Moisés Mansur Cisneyros, ma’ ts’a’aban u jaajil u díirexionil, ts’o’okole’ chéen tu báaxalo’ob yéetel jo’olpóopo’ob, tumen tu ya’alaje’ “tu ts’áajo’ob díirexiono’ob ti’ najo’ob yaan Yucatán Querétaro yéetel uláak’ péetlu’umilo’ob bin, ba’ale’ ma’ táan u kaxta’al le najo’obo’, le beetike’ ts’o’ok u káajal u yantal jela’an tuukul yóok’ol “le máaxo’ob ku chíikbesa’alo’obo’”.
Tu k’a’ajsaje’ ts’o’ok óoxp’éel ja’ab k’ala’ak juntúul máak, ba’ale’ le je’elo’ chéen beeta’ab tumen Alejandro Moreno ti’al u yila’al yaan ba’ax ku beetik; yóok’lal le je’elo’ béeychaj u su’utul ti’ob 692 ektaareas ba’ale’ táan u binetik u su’utul uláak’ 9 mil 600 ektaareas u ti’al kaaj, ts’o’okole’ táan u kaxta’al ka bo’ota’ak je’el bix unaj le k’áaxo’ tumen u yuumilo’ob u kúuchil Campeche Country Club.
Beyxan tu tsikbaltaj te’e k’inako’obe’ chéen 50 séentabos bo’ota’ab ti’ob yóok’lal jump’éel metro kuáadradóo, le beetik ku tukultik okolta’abo’ob. Chéen ba’axe’, u yéet éejidatario’obe’ tu yilajo’ob beyka’aj taak’in biinsa’ab ka’alikil úuchik u beeta’al múuch’tambalo’ob, tu’ux ook u k’aaba’ beey éejidatario’ob Moisés Mansur yéetel uláak’ 15 u túul máako’ob, máaxo’ob t’ana’abo’ob xan tu táan tribunal.
Tak walkila’ ma’ jets’a’an u k’iinil, tu ya’alaje’ áabogado’obe’ yaan u ka’a páayt’antiko’ob ma’ili’ je’ets’ek wa ba’ax ti’al u yutsil éejidatario’ob yóok’lal je’el ba’axak je’el u beetik u jelpajal ba’ax táan u beeta’al walkila’ tu táan máaxo’ob tu majáantajo’ob k’aaba’ob yéetel u tu táan u yuumil Country tu péetlu’umil Kaanpech.
Xak'alutskíinsa'an tumen: Sasil Sánchez Chan
