Maanal u 46 por siientoil táanxel máak xíimbaltik Méxicoe’, ku kóojol tu Aeropuertoil Cancún

Más de 46 por ciento del turismo internacional en México llega al Aeropuerto de Cancún
Foto: Juan Manuel Valdivia

Aeropuerto Internacional ti’ u noj kaajil Cancúne’ tu k’amaj maanal ti’ u 46 por siientoil péepen k’áak’ k’uch tu lu’umil México, úuchik u k’amik óoxp’éel miyoon 887 mil u túul aj xíinximbalo’ob, ti’ le waxakp’éel miyoon 320 mil kóoj te’e lu’uma’. Leti’e’ kaaj tu’ux asab ya’ab máak ku k’uchul ti’ péepen k’áak’, beey ts’a’ab ojéeltbil tumen Secretaría de Turismo Federal.

Ichil ba’ax a’alan xan tumen Datatur ti’ u mola’ayil Secretaría de Turismo Federal, ichil u winalil enero tak agosto ti’ u ja’abil 2021e’, ti’ jo’op’éel aeropuertos ti’ u noj lu’umil Méxicoe’ ku kóojol ukp’éel miyoon 613 mil u túul táanxel aj xíinximbalo’ob, le je’ela’ ku chíikbesik ka’ap’éel miyoon 824 mil u túul maanal ti’ le beyka’aj yanchaj láayli’ te’e k’iino’obo’, ba’ale’ ti’ u ja’abil 2020.

 

También te puede interesar: Más de 46 por ciento del turismo internacional en México llega al Aeropuerto de Cancún

 

Cancúne’ ti’ yaan tu yáax kúuchil, ti’ le jo’op’éel yano’obo’, tu’ux ku k’a’amal aj xíinximbal máako’ob ti’ péepen k’áak’, tumen te’elo’ k’uch óoxp’éel miyoon 887 mil aj xíinximbalo’ob, le je’ela’ ku ye’esik u 46.7 por siientoil ti’ tuláakal le j k’ucho’obo’. Beyxan, le je’ela’, tu ye’esaj u 77.9 por siientoil maanal ti’ le beyka’aj k’uch ichil enero tak agosto 2020.  

Ka’alikile’, Aeropuerto de la Ciudad de México, yaan tu ka’a kúuchile’, tu k’amaj jump’éel miyoon 483 mil aj xíinximbalo’ob, 17.8 por siiento úuchik u ya’abta’al. Aeropuerto de Puerto Vallarta, tu k’amaj 614 mil 161 aj xíinximbalo’ob; tu kúuchil Guadalajarae’ k’uch 558 mil u túulal.

U séekretarioil turismo ti’ u lu’umil Méxicoe’, Miguel Torruco Marqués, tu ya’alaje’ u k’uchul le maanal waxakp’éel miyoonesil máako’ob te’e lu’uma’, ku chíikbesik ya’abchaj tu 56.1 por siientoil aj xíinximbalo’ob ti’ le beyka’aj kóojo’ob tu ja’abil 2020.

U lu’umil máaxo’ob taalo’ob ti’ péepen k’áak’ tak Méxicoe’: Estados Unidos, Colombia yéetel Brasil, beyxan España, Ecuador, Canadá, Venezuela, Francia yéetel Alemania. 

 Xak'alutskíinsa'an tumen: Sasil Sánchez Chan