Tu jo’oloj jo’op’éel ja’ab sa’atbesa’ak u 43 xoknáalilo’ob Ayotzinapae’, láayli’ ma’ je’ets’ek tu’ux ts’o’oko’obi’, ba’ale’ táan u beeta’al xaak’alo’ob ti’al u sáasilkúunsa’al ba’ax úuchij, tumen yaan jayp’éel ba’alo’ob tu’ux ku yila’ale’ yaan ba’ax ma’ patal beeta’ab tu yóok’lalo’obi’, ma’ chéen ti’ u kúuchil u pu’ulul ta’ míis ti’ u kaajil Cocula.
Yaan 30 túumben jeets’ju’un ti’al u k’a’alal máaxo’ob táakpajo’ob te’e k’iino’ (uláak’ 10e’ yaan ba’al u yil yéetel meyajnáalo’ob yaan te’e k’iino’ob ka’acho’, ts’o’okole’ tu jelbeso’ob prueebas ti’al ma’ sáasilkúunsa’al ba’al), beyxan maanal 50 máak taka’an u pool ichil u k’iinil táan u beetik u jala’achil Enrique Peña Nieto ba’ale’ ts’o’ok u jáalk’abta’alo’ob tumen beey jets’a’ab tumen tríibunalo’ob, tumen tukulta’abe’ ts’a’ab u kuucho’ob yéetel loobilta’abo’ob.
También te puede interesar: Tras reunión con AMLO, padres señalan poco avance en caso Ayotzinapa
Xaak’al táan u beeta’al walkila’ tumen fiskaliia yóok’lal ba’ax úuch Igualae’ ma’ béeyak u náachtal ti’al u je’ets’el wa táakpaj Policía Federal yéetel Policía Ministerial de Guerrero; tu winalil noviembre ti’ u ja’abil 2020e’, macha’ab capitán José Martínez Crespo, máax déelinkuensia organizada beyxan tumen ku ya’alal yanchaj máak tu beetaj u sa’atal.
Xak'alutskíinsa'an tumen: Sasil Sánchez Chan
