Ka’aj káaj pak’be’en k’oja’an tu winalil marzo ti’ u ja’abil 2020e’, jets’a’abe’ ma’ táan u páajtal u máan kis buuts’o’ob, tumen yéetel le p’iisil je’elo’, kaxta’ab ma’ u seen pa’ak’al u k’oja’anil Covid-19 ti’ kaaj, ts’o’okole’ yáax luk’sa’ab ti’al u winalil junio, ka’aj náats’ u k’iinil yéeytambal, ba’ale’ bejla’a’ 4 ti’ octubree’ yaan u káan luk’sa’al le p’iisil kananila’.
Le 19 ti’ septiembre máaniko’, u jala’achil u lu’umil Yucatáne’ tu túxutaj k’a’aytajil ts’íib ti’al u k’a’aytaik le p’iisila’ yaan u tse’elel le k’iin je’ela’.
A’alabe’ yaan u páajtal u luk’sa’al tumen ts’o’ok u ya’abtal xan kaaj máax ti’ ts’o’ok u ts’a’abal u báakunai’, tumen ka’ache’ ma’ táan u páajtal u jóok’ol máak ichil láas 11:30 áak’ab tak las 5 tu taal u píik’il; ti’al u k’iinil 20 ri’ noviembree’ yáax tsela’ab jun jaatsi’, tumen ichil domingo tak miércolese’ luk’sa’abij.
Mauricio Sauri Vivas, máax jo’olbesik Secretaría de Salud de Yucatán (SSY), tu ya’alaje’, tu jets’ajo’ob u tseliko’ob le p’iisila’ ich ka’a jaats, tumen beey tsolxikinta’abob tumen Comité jach kaambanaja’ano’ob yóok’lal toj óolal.
También te puede interesar: Este 4 de octubre, Yucatán sin restricción vehicular
Beyxan tu ya’alaje’, beéychaj u je’ets’el u tse’elele’, tumen ts’o’ok xan u ya’abtal kaaj ts’a’aban u báakunai’, tumen yéetele’ ts’o’ok u chan éensa’al u xookil jaytúul máak ku kíimil yóok’lal u k’oja’anil Coronavirus, le beetike’, bejla’a lunese’ yaan u páajtal u máan máan x ma’ p’iisilli’.
Ba’ale’, leti’e’ tu ya’alaj ts’o’okili’ u yila’al je’el u béeytal u tse’elel le p’iisila’ lik’ul u yáax k’iinil septiembre, kex tumen chéen jo’op’éel k’iin máanja’an ti’ báakuna ku ts’a’abal ti’ u jaats kaajil yaan u ja’abil ichil 18 tak 29, ba’ale’ tu jets’aj u páa’tajo’ob, ti’al u máan jayp’éel k’iino’ob táan u ts’a’abal u ka’a jaatsil báakuna ti’al máax yaan u ja’abil ichil 30 tak 39.
Tu tsibkaltaj xane’, táan xan u suut máak xook te’e kúuchilo’obo’, le beetik tu tukultajo’obe’ ma’alob ka u p’áa’to’ob uláak’ jayp’éel k’iino’ob ti’al u tse’elel “toque de queda”, je’el bix pata’ab u k’aaba’ le p’iisila’.
Xak'alutskíinsa'an tumen: Sasil Sánchez Chan
