Foto: Miguel Améndola

Máax beetik u séekretaryoil Defensa Nacional, Luis Cresencio Sandoval, tu ts’áaj k’ajóoltbil ka’alikil táan u beeta’al ja’atskab tse’ek, le martes máanika’, ts’o’ok u túuxta’al Tulum 450 u túul u aj meyajilo’ob Marina, Guardia Nacional yéetel Ejército ti’ u lu’umil México, ti’al u mu’uk’ankúunsa’al kanan ku beeta’al te’elo’.

“Walkila’ ts’o’ok u k’uchul Tulum le 450 u túul máak túuxta’abo’, ka’awjeak tu beeta’abb tuláakal ba’ax k’a’abéet ti’al u páajtal u yantal Ejército, Guardia Nacional yéetel Marina te’elo’, tu yóoxp’éelil jaats meyaj táan u meyajo’ob te’elo’”, tu ya’alaj Cresencio Sandoval.

 

También te puede interesar: Llegan a Tulum 450 elementos federales para reforzar seguridad

 

Beyxan, tu táanilunsaje’, le p’isk’iinil ku taala’ leti’ kéen ts’o’okok u patjo’olta’al meyaj ku tukulta’al u beeta’al ti’al u kaláanta’al kaaj te’e baantao’; ichile’ ti’ yaan ka ya’abkunsa’ak máaxo’ob ku kanan te’elo’, tumen yaan u k’a’abéetkunsiko’ob u kúuchil Guardia Nacional yéetel Ejército, ti’al u páajtal u yantal máaxo’ob kun k’uchuli’.

“Jayp’éel winalo’ob paachile’ tu kaajil Tulume’ je’ets’ u meyaj jun jaats máako’ob ti’al u ts’aatáanta’al jump’éelili’ ba’al k’a’anan u yila’al te’elo’, je’el bix úuchik u bin u yúuchul ba’ale’, beyxan úuchik u bin u tukulta’al ba’ax unaj u beetchajal, tumen chíikpaj déelinkuéensyai’, le beetik tukulta’al u beeta’al uláak’ nu’ukbesaj, tu’ux táakbesa’ab 250 u túul aj kanan máako’ob, ba’ale’ yaan u ya’abkunsa’al tak kéen k’uchuk 400-450”, tu ya’alaj séekretaryo. 

Tu ka’a jets’aj, je’el bix úuchik u ya’alik jala’ach Andrés Manuel López Obradore’, yaan u yila’al ka ts’aatáanta’ak tu beel ba’ax táan u yúuchul Tulum, “ba’ale’, beyxan tuláakal le baanta’ je’elo’, tu’ux yaan Riviera Maya, Cancún, yaan u yila’al ka yanak le jaytúul aj kanan máak k’a’abéet ti’al u yéemel le beyka’aj loobilaj yaan”.

U múuch’il Grupo de Coordinación Quintana Roo tu ts’áaj k’ajóoltbile’ táan xan u ya’abkunsa’al kanan ku beeta’al ti’al u yutsil kaaj yaan chúumuk yéetel tu baantail otelo’ob tu kaajil Tulum.

Xak'alutskíinsa'an tumen: Sasil Sánchez Chan