Foto: Gobierno del Estado

Yanchaj u k’e’exel u súutukil u beeta’al Martes del jaguar, walkila’ lalaj áak’ab kéen beeta’ak. Ba’ale’ x jala’ach Layda Sansores San Román, tu chíikbesaj junjaats ayik’al tu’uk’il Palacio de Gobierno Estatal, tu kan t’o’olil le kúuchilo’, tu’ux ojéela’an ku meyaj ka’ach le jala’acho’, te’elo’ yaan tu’ux u wenel máak, k’óoben yéetel tu’ux u je’elel máak, óoli’ beey jump’éel naje’. 

Ka’alikil táan u tuch’ubta’al jejeláas ba’al tumen ma’ patal úuchik u k’a’abéetkunsa’al u taak’inil kaaje’, e’esa’ab xan jaats meyaj beeta’ab tumen Alejandro Moreno Cárdenas, máax tu táanilkuunsaj meyaj ti’al Ciudad de Méxicoi’, ma’ ti’ u péetlu’umil Kaanpechi’, le beetik x jala’ache’ tu ya’alaj le tu’uk’il je’elo’ yaanal bix kéen k’a’abéetkúunsa’ak walkila’ yéetel ts’o’ok xan u k’iinil tuusil meyaj.  

 

También te puedo interesar: Exhibe Layda Sansores lujos en la oficina del gobernador

 

Tu tsikbaltaje’, oochelo’obe’ ma’ táan u jach e’esiko’ob tu beel le ba’ax ku takpoltalo’, ma’ táan u yokol tu pool u yantal ka’ach “u yotoch” jala’ach jach chéen u ti’ale’, tumen u meyaj leti’e’, leti’ u táanilkunsik ba’ax k’a’abéet ti’ kaaj.  

U toopile’, tu ya’alaj, tumen le kúuchilo’ unaj ti’al u beeta’al u meyajil jala’ach, ma’ ti’al chéen juntúul máaki’, mix xan ti’al u ayik’al kuxtali’; juntúul kaanpechile’ mix táan u páajtal u yantal ba’al beey u ti’alo’ tumen yáaxe’ jach táaj jump’íit u náajali’, p’el u yantal ti’ ti’al u tséentik u baatsil, ts’o’okole’ tu ch’a’achibtaj ba’ax a’ala’an tumen Instituto Nacional de Estadística y Geografía (Inegi), tu’ux ku jet’sike’ maanal u chúumukil kaanpechilo’obe’ kuxa’ano’ob ich óotsilil.

Beyxan tu yaj óoltaj ma’ patal úuchik u k’a’abéetkunsa’al péeriodismoi’, tumen tu yilaj u tsool k’aaba’ kex 63 u túul aj ts’íib péektsilo’obe’ ku k’amiko’ob ichil 100 yéetel 150 mil pesos lalaj winale’ yóok’lal jejeláas meyajo’obi’, ichilo’obe’ u k’a’ayta’al ba’ali’.

Sansores San Románe’ ma’ tu yóotaj u ya’al mix jump’éel k’aabai’, tu ya’alaje’ jujump’íitil kéen káajak u yojéelta’al máaxo’obi’. Ts’o’okole’ tu k’a’aytaje’, 82 mil pesos  u náajal leti’ beey jala’acheil, le beetik ku yaj óoltik ka yanak aj ts’íib péektsilo’ob náajaltik ya’abach taak’in tumen mix chuka’an ba’ax ku k’a’aytiko’obi’”, tu ya’alaj.

Xak'alutskíinsa'an tumen: Sasil Sánchez Chan