de

del

Administración del Patrimonio de la Beneficencia Pública (APBPY) tu ts’áaj jayp’éel kaambal xook ti’ maanal 200 u túul ts’akyajo’ob yéetel x k’ampaalo’ob, ti’al u mu’uk’ankúunsa’al ichilo’obe’ bix unaj u kaláantiko’ob ko’olel yo’omchaja’ano’ob.

Meyaje’ múul beeta’ab ichil Secretaría de Salud (SSY) yéetel Alianza Global Pediátrica. U tuukulile’ ka u kan uláak’ ba’alo’ob yóok’lal bix unaj u kaláanta’al yéetel u ts’aatáanta’al ko’olel yaan u yantal u chanpaal ba’ale’ tu’ux ka chíimpolta’ak miatsil, yéetel tu’ux ka yanak kéet óol ichil ko’olel yéetel aj meyajo’ob ts’aatáantiko’ob.

Kaambale’, kan jaats jóok’sa’an ti’: X ma’ keetil kuxtal ich kaaj; U Páajtalil Wíinik; Chíimpolal tu k’iinil u kaláanta’al chanpaal yéetel U nu’ukbesjail meyaj ti’al u yutsil ts’aatáanta’al u toj óolal wíinik tu’ux ka chíimpolta’ak miatsil. Yáax jaatsil kaambale’ káaj tu k’iinil 30 ti’ septiembre yéetel ts’o’ok 22 ti’ octubre, ts’o’okole’ táakpaj 100 u túul máak ti’ 63 u p’éel méek’tankaajo’ob.

 

También te puede interesar: Capacitan a parteras y médicos rurales de Yucatán

 

U ka’a jaatsile’, káaj te’e winala’ yéetel yaan u ts’o’okol diciembre, tu’ux yaan u táakpajal uláak’ 100 u túul máak.

“Kaambale’ ku beeta’al ti’al u múul kanik máak ba’al, tu’ux ka k’a’abéetkunsa’ak u nu’ukulilo’ob kaambal suuk u meyaj ti’ kaaj, beyxan tu’ux ka kéet yanak xiib yéetel ko’olel, yéetel tu’ux ka chíimpolta’al U Páajtalil Wíinik”, a’alab tumen APBPY.

Alianza Global Pediátricae’ ku ts’áaj u yuumil ti’al ka’ansaj, máaxo’ob beetik x ma’ bo’olili’, tu’ux xan táaka’an Fundación Bepensa yéetel Galletas Dondé. Ka’alikil mola’aye’, táan u kaxtik u beetik uláak’ mokt’aano’ob ti’al ma’ u ch’éenel u táakmuk’tik ba’al ti’al u yutsil u toj óolal ko’olel ku yantal u neene’ ti’ le péetlu’uma’. 

Tu winalil enero ka káaj u yúuchul tsikbal yéetel x k’am paalo’ob ti’ u mejen kaajilo’ob Tibolón yéetel Chumbek, tu’ux j ts’a’ab ti’ob nu’ukulo’ob ku meyaj ti’ kúuchilo’ob ts’akyaj yéetel beeta’ab u jeel tsikbalo’ob ti’al u ts’a’abal ti’ob séertifikasyon beyxan u chíimpolalil jets’ik u kanmajo’ob tu beel u meyajo’obi’.

Xak'alutskíinsa'an tumen: Sasil Sánchez Chan