Ka’alikil ti’ yaan tu kaajil Progreso, u jala’achil u péetlu’umil Yucatán, Mauricio Vila Dosal yéetel u séekretaryoil Turismo, Miguel Torruco Marquése’ tu ts’áajo’ob k’ajóoltbil 75 u p’éel nu’ukbesajo’ob ti’al u xíimbalta’al u kaajil Jo’, Capital Cultural y Gastronómica del Sur; beyxan Riviera Yucatán, tu’ux je’el u k’uchul yantal maanal 19 mil 688 u p’éel meyaj ti’al kaaj, tu’ux yaan u k’a’abéetkunsa’al maanal 17 mil 207 miyoonesil pesos.
Tu kúuchil Casa de la Cultura, Julián Zacarías Curi, u jo’olpóopil u kaajil Progreso tu k’a’ajsaje’, tu winalil septiembre ti’ u ja’abil 2018e’, ka’aj ook meyaje’, mina’an mix ja’ te’elo’: “mix ba’al yaan weye’, jach k’aas yanil ba’al te’e k’inako’obe’”, tu ya’alaj.
También te puede interesar: Invertirá la IP casi 7 mil mdp en 51 nuevos proyectos en Yucatán
Tu yáax winalil meyaje’, tu tsikbaltaj, tu láak’intaj jala’ach Vila Dosal tak Miami ti’al u múul tsikbalo’ob yéetel u mola’ayil Carnival, tu’ux ku k’ujsa’al u cheemil aj xíinximbal máako’ob tak Progreso. Ba’ale’ ti’ j-a’alab ti’ob mola’aye’ “ma’ taak u ka’a suut wey lu’ume’”.
“Jala’ach túune’ tu k’áataj ka ts’a’abak ti’ob 100 k’iino’ob ti’al u beeta’al meyajo’ob. Beey úuchik u káajal u k’éexel Progreso”, tu ya’alaj. Ichil ba’ax táan u beeta’ale’, ti’ yaan úuchik u beeta’al Prolimpia, mola’ay ku máan u mol u ta’il míis kaaj; beyxan j ts’a’ab nu’ukul k’a’abéet ti’al u yantal uk’be’en ja’ ti’ kaaj yéetel túumbenkunsa’ab kúuchilo’ob chéen beey tu’ubsa’ano’obi’.
Beyxan beeta’ab meyajo’ob ti’al u je’ebel bej tu’ux ka k’uchuk máak te’e jáal ja’o’, j ts’a’ab u kúuchilo’ob báaxal yéetel k’íiwiko’ob; yaan uláak’o’ob je’el bix Casa de la Cultura yéetel merkaadóo.
Beey túuno’, tu súutukil úuchik u t’aan máax jo’olbesik Secretaría de Turismo (Sectur), Miguel Torruco Marqués, tu ya’alaje’ tu winalil octubree’, u péetlu’umil Yucatánae’ p’áat ichil le óoxp’éel péetlu’umo’ob ti’ u lu’umil México, tu’ux ya’ab taak’in ku ts’a’abal ti’al u beeta’al meyajo’ob ti’al u k’a’amal aj xíinximbalo’obi’.
Yéetel k’a’aytajilo’ob beeta’ab te’e k’iino’oba’, ojéelta’ab táan u chúukpajal taak’in táan u ts’a’abal ti’al u beeta’al meyajo’ob, maanal 27 mil miyoonesil pesos, yaan u ts’a’abal ti’ wakp’éel jaatso’ob yaan ti’ le péetlu’uma’, yéetel yaan u beetik u yantal 41 mil u p’éel meyajo’ob ti’al kaaj.
Xak'alutskíinsa'an tumen: Sasil Sánchez Chan
