Ikil táan u yantal 16 k’iino’ob ti’al u chíikbesa’al meyajo’ob ku taal u beeta’al ti’al u xu’ulsal loobilaj ku beeta’al yóok’ol ko’olele’, u múuch’kabil Gobernanza Mx tu k’a’aytaj u ts’áak k’ajóoltbil u páayt’aanil yáax Escuela Feminista de Quintana Roo, tu’ux yaan u ts’a’abal kaambal xook ichil u winalil enero tak marzo ti’ le ja’ab ku taalo’. Páay’taane’ ku beeta’al ti’al ko’olel yaan u ja’abil ichil 18 tak 30, tumen u tuukulil le najil xooka’, leti’e’ u yantal uláak’ ko’olel táan u bin u líik’il yéetel féeminista tuukul ti’ le péetlu’umo’.
Ti’ k’a’aytajil tsikbal beeta’abe’, máaxo’ob táaka’ano’ob ich Gobernanza Mx, Silvia Chuc, Mariana Belló yéetel Mónica Franco tu ya’alajo’ob páayt’aane’ “tukulta’an ti’al u k’ajóolta’al, u ka’anal, u tukulta’al yéetel u patjo’olta’al ba’ax ojéela’an yóok’lal le je’ela’, tu’ux ka béeyak u ts’a’abak u beel ko’olel tumen uláak’ jach kaambanaja’an yóok’lal féeminista tuukul, beyxan yóok’lal u páajtalilo’ob ko’olel yéetel bix u jejeláasil u yúuchul múul meyaj ich ko’olel”.
También te puede interesar: Anuncian creación de Escuela Feminista en Quintana Roo
Kaambale’ x ma’ bo’olil kéen beeta’ak yéetel xa’ak’an bix kéen ch’a’abak, ti’ Internet yéetel te’e najil xooko’. Yaan u káajal tu k’iinil 21 ti’ enero yéetel yaan u ts’o’okol 12 ti’ marzo; kaambale’ yaan u beeta’al lalaj viernes tu súutukil 6 tu taal u chíinil k’iin, tak 8 áak’ab, beyxan sábados 10 ja’atskab k’iin taj 12 chúumuk k’iin, ti’ u yoorail Quintana Roo. Ka’alik u beeta’al kaambale’, áaktibistaobe’ yaan u tsikbaltiko’ob ba’ax ts’o’ok u kaniko’ob ti’ uláak’ x lo’obayano’ob, ba’ale’ kex beyo’ tu ya’alajo’obe’ tu paachil k’iine’, kéen beeta’ak uláak’ kaambale’, yaan u cha’abal u yantal uláak’ ko’olel de yaanal u ja’abil.
Uláak’ ba’ax ku k’áata’ale’ leti’ le je’ela’: ka yanak ko’olel tu kaajil Benito Juárez, wa ma’e’, ka béeyak u k’uchul tak te’elo’ ti’ bix ku páajtale’, ka yanak féeminista tuukul, u túuxta’al ts’íib tu’ux ku tso’olol ba’axten taak u táakpajal ti’ le kaambala’, ti’ u kóoreoil [email protected], u jach ya’abil ts’íibe’ junwáal, ts’o’okole’ unaj u chupa’al le fóormularyoa’: https://forms.gle/Tp4Snx17rGazerkRA. U ts’ook k’iinil u ts’íibtik u k’aaba’ ko’olele’ 7 ti’ enero ti’ u ja’abil 2022.
Jayp’éel ti’ ba’ax kun ilbil te’e kaambala’ leti’ le je’elo’oba’: u páajtalil wíinik, tu’ux yaan u xak’alta’al féeminista tuukul, péeksajilo’ob beeta’an tumen ko’olel yéetel múul yantal; nu’ukulo’ob je’el u k’a’abeetkunsa’al ti’ a’almajt’aan; nu’ukulo’ob k’a’anan ti’al u toj óolal ko’olel; bix u p’i’isil x ma’ keetil kuxtal yéetel loobilaj, ichil uláak’ ba’alo’ob.
Xak'alutskíinsa'an tumen: Sasil Sánchez Chan
