de

del

Tu péetlu’umil Yucatáne’ yaan u jejeláas talamilo’ob ti’al u yantal uk’be’en ja’; le beetike’, yéetel u nu’ukbesajil #AguaDigna para Yucatán, Educampoe’ táan u beetik meyajo’ob t’ial u k’ujsa’al utsil ja’ ti’ mejen kaajo’ob, tumen chéen ja’alil beyo’ ku páajtal u kaláanta’al u toj óolal máak yéetel yóok’ol kaab.

Meyaje’ táan k’a’aytal tu kúuchil HIPGive yéetel u nu’ukbesajil Tierras Mayas, tu’ux táan u k’áata’al áantaj ti’ kaaj ti’al u k’a’amal taak’in, tumen yéetele’ yaan u béeytal u beetik meyaj ti’al u yutsil maaya kaajo’ob. Tak le viernes 26 máaniko’ ts’o’okili’ u much’a’al 38 mil 177 pesos, ba’ale’ u tuukulile’, leti’ ka béeyak u k’uchul tak 40 mil. 

Ti’ u ya’abil u kaajil Jo’e’, yaan bix u k’uchul ja’ ti’ mantats’: kéen xi’ik baañoe’ yaan ja’i’, chéen u wach’ik yaabee’ ku yantal ti’al u p’o’, ma’ táan u yantal u páa’tik máak u k’áaxal cháak ti’al u yantal ja’. Ba’ale’, yaan mejen kaajo’ob tu’ux ma’ beyi’, tumen ma’ táan u k’uchul uk’be’en ja’ yiknalo’obi’, wa chéen junsúutuk ku jóok’sa’al ja’ u ti’alo’ob, ma’ mantats’i’, kex tumen le je’elo’ jump’éel páajtalil unaj yaan ti’ wíinik.

 

También te puede interesar: Educampo lleva agua digna a comunidades mayas de Yucatán

 

Educampoe’ jump’éel múuch’kabil maanal 58 ja’abo’ob káajak u meyaj. Ku beetik jejeláas ba’al yaan u yil yéetel u yutsil kaajo’ob p’ata’ano’ob paachil tu noj lu’umil México. Walkila’, táan u meyaj ti’ bolonp’éel péetlu’umo’ob, ichilo’obe’, ti’ yaan Yucatán. 

Rosa María Gómez Sosa, máax jo’olbesik le múuch’kabila’, tu ya’alaj tu páatlu’umil Yucatán yaan ya’abach ja’, ba’ale’ ma’ tu páajtal u k’ujsa’al ti’ kaaji’, talam u meyajta’al, ts’o’okole’ yaan máake’ ku ts’áak ti’ nu’ukul ma’ patal u ti’ali’, le beetik ku yantal u jejeláasil talamil ti’ u toj óolalo’ob.

Le beetik le múuch’kabila’ táan u biinsik ukbe’en ja’ tu kaajil Yaxcabá yéetel Tekax; táan u k’a’abéetkunsa’al nu’ukbesajo’ob ti’al u jóok’sa’al utsil ja’ ti’al u yantal ti’ kaaj, ts’o’okole’ táan xan u ye’esa’al bix unaj u meyajta’al le ja’o’, ti’al u kaláanta’al yéetel ma’ u k’askúunta’al. Beyxan e’esa’ab ti’ob bix u beetiko’ob u beel ti’al u bin éek ja’, tumen beyo’ ma’ táan u bin te’e yáanal lu’umo’, ichil uláak’ ba’alo’ob.

Gómez Sosae’ tu tsikbaltaje’ maanal ka’ap’éel ja’ab káajak u meyajo’ob te’e ka’ap’éel kaajo’oba’, tu’ux ku beeta’al uts ti’ 800 u túul máak. Nukuch graanjaobe’ jump’éel ti’ le ba’ax beetik u k’astal ja’, tumen ku k’uchul tak te’e yáanal lu’umo’. Wa ku yantal máax taak u yáantaje’, ku yutstal u yokol ti’: https://hipgive.org/es/campaign/TierrasMayas21/aguadigna_para_yucatan 

Xak'alutskíinsa'an tumen: Sasil Sánchez Chan