Consejo Coordinador Empresarial de la Riviera Maya, Asociación de Hoteles de la Riviera Maya, u múuch’kabil aj meyeajo’ob yéetel uláak’ mu’uch’o’obe’ k’amik aj xíinximbal máako’obe’ tu ya’alajo’ob ti’ k’a’aytajil ts’íibe’, ki’imak u yóolo’ob yóok’lal k’a’aytajil beeta’ab tumen máax jo’olbesik Fondo Nacional de Fomento al Turismo (Fonatur), Rogelio Jiménez Pons, ikil yaan u k’e’exel u beel Tren Maya.
Máax jo’olbesik Fonatur tu ya’alaje’ le túumben k’eexila’ yaan u beeta’al tu jaatsil 5 Xaman. Le je’ela’ u k’áat u ya’al beje’ yaan u máan kex 20 kms yóok’ol u t’o’olil aalta tensión Comisión Federal de Electricidad (CFE), toj yanik ti’ u noj bejil 307 (Cancún-Tulum), ts’o’okole’ yóok’lal uláak’ jump’éel jaats yaan “ichile’”, yaan u yantal u k’áatiko’ob ka ts’a’abak u páajtalil u yúuchul meyaji’.
Ma’ili’ beeta’ak le k’eexila’, bej k’a’aytane’ yaan ka’ach u máan yóok’ol u ka’a t’o’olil bej kun ts’áabil tu noj bejil 307, ku taal Playa del Carmen tak tu’ux ku náakal jun xóot’ bej tu ts’ook u k’áaxil Aeropuerto Internacional de Cancún.
También te puede interesar: Empresarios agradecen cambio en trazo del Tren Maya anunciado por Fonatur
Yóok’lal k’eexile’, yaan u jelpajal bej ku máan tu tojil Puerto Morelose’, tu chúumuk bejil Playa del Carmen yéetel Cancúne’, tumen yaan u jóok’ol tu chúumukil le noj bejo’ ti’al u yáalkab kex 20 kms yóok’ol bej tu’ux cha’aban u páajtal u beeta’al meyajo’ob - u t’o’olilo’ob aalta tensión ti’ CFEe’-, ts’o’okole’ uláak’ jun jaats yaan “ichile’” yaan u máan tu éejidoil Alfredo V. Bonfil, yéetel ti’ kun náakal tu kúuchil je’elil yaan u ts’a’abal tu paach u téerminalil Cancún, le je’ela’, kex ku ye’esik kex 27 kms ti’ uláak’ túumben bej.
“Le k’eexila’ yéetel tuláakal ba’ax unaj u beeta’al ti’al u ch’a’ajolta’al meyajo’obe’, yaan u chíikpajal ikil táan u yantal túumben mokt’aan ichil u jala’achil u lu’umil México, ti’al u béeytal u meyajlta’al Tren Maya, yéetel uláak’ nu’ukbesjao’ob no’ojan ti’al kaaj”, tu ya’alaj Jiménez Pons.
Tu tsolaje k’eexile’ táan u beeta’al tumen yaan ya’abach talamilo’ob tu yáanalil le lu’um le jaatsil bej yaan tu jóok’bal u kaajil Cancún, le beetike’ yaan u tséelta’al. Le beetik túune’ Consejo Coordinador Empresarial de la Riviera Maya tu jóok’saj jump’éel k’a’aytajil ts’íib ti’al u chíimpoltik ba’ax je’ets’ tumen Fonatur, ba’ale’ tu k’áatajo’ob xan ka k’e’exek u beel ti’al u máan jáalik le noj kaaja’, ti’al ma’ u yantal tu chúumuk Playa del Carmen.
Xak'alutskíinsa'an tumen: Sasil Sánchez Chan
