Ichil ba’ax a’alab tumen Aníbal Ostoa Ortega, máax beetik u séekretaryo jéeneralil Gobiernoe’, ba’ax táan u yúuchul yéetel le jejeláas táanxel kaajil máako’ob taalja’ano’ob ti’ uláak’ lu’umo’obe’ unaj u ts’aatáanta’al tumen u jala’achil u lu’umil México yéetel tumen Instituto Nacional de Migración (INM) tumen leti’ob táan u yilik ba’ax kun úuchul yéetel le maanal mil 260 u túul máako’ob táan u kaxtik u k’uchulo’ob Estados Unidos, ba’ale’ yaan jaytúul ti’ leti’obe’ táan u tukultik u p’áatalo’ob tu lu’umil México.
Meyajnáal tu ya’alaje’, u jala’achil u lu’umil Kaanpeche’, táan u beetik tuláakal ba’al ku páajtal ti’al u ts’aatáantiko’ob; ma’ táan u ch’a’anuktik u nu’ukbesajil kanan te’e kaajo’ je’el bix unaje’, ti’al beyo’ táanxel kaajil máako’ob, p’ata’ano’ob tu kúuchil Concordia yéetel u doomoil Siglo XXIIIe’, u páajtal u maniko’ob nu’ukul k’a’abéet tu’ob wa ba’al ti’al u ts’éentikubáajo’ob.
También te puede interesar: Secretaría General de Gobierno de Campeche se deslinda de migrantes
Ba’ale’ Secretaria Generale’ tu ya’alj “Migración bin unaj u yilik, tumen jump’éel ba’al ti’ u lu’umil México, ts’o’okole’ U Jala’achil u noj lu’umil Méxicoe’ ma’ táan u páajtal u beetik noj ba’al u ti’al u yáantiko’ob.
Beyxan tu ya’alaje’, wa ka k’uchuk u k’a’abéetkunsa’al áantaje’, leti’ u jala’achil u péetlu’umil Kaanpech kun áantajo’, tumen le ka’aj yáax k’uch jun jaats máako’obe’ tu túuxtaj aj ts’akyajo’ob ti’al u ts’aatáata’alo’ob, tumen tu ya’alaje’, yanchaj waktúul máax ti’ tsa’ay Covid-19i’.
Ostoa Ortega tu p’ataj sáasile’ leti’obe’ u k’áat u kaláanto’ob yéetel u beetiko’ob uts ti’ob, ba’ale’ táan u páa’tiko’ob ka yanak múul meyaj, ti’al u páajtal u táakbesikubáajo’ob.
Aj pat a’almajt’aano’obe’ ku tukultiko’ob Migracióne’ unaj u sáasilkunsik bix yanik u jaajil ba’al
Daniela Martínez, máax beetik u x pat a’almajt’aanil Movimiento Ciudadano (Moci), Ricardo Medina Farfán, máax jo’olbesik u páarlamentaryoil múuch’il Partido Revolucionario Institucional (PRI) yéetel Pedro Cámara Castillo, j pat a’almajt’aanil panistae’, tu ya’alajo’ob unaj u chíimpolta’al a’almajt’aano’ob, ts’o’okole’ ku na’atiko’ob bin u k’a’ananil u ts’aatáanta’al ba’ax ku yúuchul yéetel táanxel kaajil máako’ob k’ucho’ob tu péetlu’umil Kaanpech te’e k’iino’oba’, ba’ale’ tu jets’ajo’obe’ k’a’anan u sáasilkúunsa’al bix yaniko’ob ka’aj k’ucho’ob, jaytúulo’ob, ba’ax unaj u beetiko’ob yéetel ti’ ba’ax je’el u páajtal u yáanta’alo’ob.
Xak'alutskíinsa'an tumen: Sasil Sánchez Chan
