Ya’abach táanxel kajil máako’ob mina’an u ju’uno’ob ti’al u p’áatalo’ob tu lu’umil Méxicoe’ k’ucho’ob tu noj kaajil Cancún. Ti’ luk’o’ob tu kaajil Tapachula, tu péetlu’umil Chiapas. Leti’obe’ ti’ j k’a’amo’ob tu noj najil xook séekundarya número 9, p’aatal tu baantail 103.
También te puede interesar: Llega a Cancún un centenar de migrantes
Ti’al túun u biinsa’al le múuch’il máako’oba’ péeknaj u mola’ayil Instituto Nacional de Migración (INM) liki’ul u kaajil Tapachula, tu’ux yaan jayp’éel talamilo’ob ikil u seen k’uchul tajan ya’abach táanxel kaajil máako’ob siijilo’ob ti’ u noj lu’umil Haití, ba’ale’ beyxan ojéela’an yaan uláak’ máako’ob ku taalo’ob ti’ uláak’ noj lu’umo’ob.
U jala’achil le lu’umo’, Carlos Joaquín Gonzáleze’ tu ya’alaj tak ma’ seen úuchake’, yaan u yantal u biinsa’al Cancún kex 500 mil u túul ti’ le táanxel kajil máako’oba’, tumen beey úuchik u k’a’ayta’al tumen INM, ti’al u páajtal u ts’o’oksa’al u yila’al u ju’unilo’obi’. Beyxan tu ya’alaje’ yaan u p’ata’al tu beel jayp’éel kúuchilo’ob ti’al u páajtal u yantalo’ob ka’alikil táan u yila’al bix kun p’áatal u ju’uno’obi’.
Xak'alutskíinsa'an tumen: Sasil Sánchez Chan
