de

del

Foto: Juan Manuel Valdivia

Kex juntéen ichil jump’éel p’iisk’iinile’ ku k’a’ayta’al túumben bejo’ob ku kóojolo’ob Cancún; le 15 ti’ diciembre ku taala’ yaan u je’ebel bej juntats’ kun bin tak Sao Paulo, Brasil, le beetik ti’ ts’ook xaak’al beeta’ab tumen u kóonsultorail ForwardKeys, tu chíikbesaj le kajaa’ beey u ka’ap’éelil tu’ux asab ya’ab u k’uchul aj xíinximbalo’ob ichil tuláakal yóok’ol kaab, tu paach Dubai.  

Lik’ul u ja’abil 2010e’ ForwardKeys ku chíikbesik máaxo’ob ku jóok’ol xíinximbal, tu’ux, ba’ax k’iin yéetel beyka’aj k’iino’ob. Ti’ u ts’ook xaak’al tu beetaje’, ku ke’etel ba’ax chíikpaj tuj ja’abil 2021 yéetel ba’ax yanchaj 2019. Te’elo’ ila’ab Cancúne’, ichil le k’iino’ob ts’o’ok u yáalkab ti’ le ja’aba’, leti’e’ ka’ap’éel tu’ux asab ya’ab u k’uchul táanxel kaajil máak ti’al xíinximbal.

 

También te puede interesar: Tras Dubái, Cancún es segundo lugar en arribo de viajeros internacionales

 

Ti’ u kaajil Caribee’ yanchaj u kamp’éel por siientoil xíinximbal beeta’ab ti’ táanxel lu’umil ichil tuláakal yóok’ol kaab. Ciudad de Méxicoe’ ti’ yaan tu kúuchil 16.

Ichil ba’ax j ts’a’ab ojéeltbil tumen Asure’, tu kúuchil Aeropuerto Internacional de Cancún, ts’o’ok u kóojol, ichil enero tak noviembre ti’ u ja’abil 2021e’, 11 miyoones 603 mil 123 u túul aj xíinximbalo’ob ti’ péepen k’áak’ taalja’an ti’ táanxel lu’umo’ob.

Andrés Aguilar Becerril, u meyjnáalil Secretaría de Turismo (Sedetur) te’e péetlu’umo’ tu ya’alaj te’e ja’aba’, ch’a’ajolta’ab bej ts’o’okili’ u yantal ka’ach tu ja’abil 2019, ba’ale’ beyxan ya’abkunsa’ab uláak’ mina’ani’, je’el bix le ku bin Barcelona tak Cancún, Chetumal tak Miami yéetel uláak’ u kaajilo’ob Estados Unidos mina’an ka’achij.

Beyxan, ma’ táan u xáantal kéen k’a’ayta’ak u túmben bejil kun k’uchul Houston yéetel Minneapolis, tu noj lu’umil Estados Unidos.

Tu tsikbaltaj xane’, jump’éel ba’ax u béeykunsamaj ka u ch’a’a bej tuka’atéen u meyajil u k’a’amal aj xíinixmbalo’ob tu péetlu’umil Quintana Rooe’, leti’e’ bix táan u yantal u jeel bejo’ob tumen jump’éel ti’ le yáax ba’ax táakbesa’ab tumen Consejo de Promoción Turística de Quintana Roo, le beetik ya’abchaj u páajtalil u k’uchul máak te’elo’.

Kex beyo’, tu ya’alaj xan u k’a’ananil u mu’uk’ankúunsa’al u ts’a’abal báakuna ti’ kaaj yéetel u ts’a’abal séertifikasyon ti’ kúuchilo’ob ti’al u xíimbalta’alo’ob. 

Xak'alutskíinsa'an tumen: Sasil Sánchez Chan