Máax jo’olbesik u kúuchil Centro de Reinserción Social (Cereso) ti’ u noj kaajil Jo’, Francisco Brito Herrera, tu jets’aje’, ti’al u k’iimbesajilo’ob diciembree’ yéetel ti’al u ts’o’okbal le ja’ab yaniko’ona’, yaan u páajtal u xíimbalta’al máaxo’ob k’ala’anob te’elo’.
Tu ya’alaje’, xíimbale’ yaan u páajtal u beeta’al tu k’iinilo’ob: 25 ti’ diciembre yéetel 2 ti’ enero ti’al máax láayli’ u xak’alta’al wa yaan u kuucho’ob; 31 ti’ diciembre yéetel 1 ti’ enero ti’al máaxo’ob jeets’el u si’ipil.
Beyxan tu ya’alaje’ yaan u beeta’al miisa, je’el bix suuka’anil tu yáak’abil 24 ti’ diciemebre, yóok’lal Navidad; u j áarsobiispoil Yucatán kun beetik, Gustavo Rodríguez Vega, yéetel yaan xan u beeta’al u áak’ab jaanalil Navidad yéetel Túumben Ja’ab.
U k’oja’anil yéetel kíimil yóok’lal Covid
Yóok’lal le k’oja’anila’, xoka’an junk’aal máak ts’o’ok u tsa’ayal ichil Cereso, ti’ u noj kaajil Jo’; óoxtúul máak kíim yóok’lal, yéetel jo’otúul máake’ yanchaj u yoksa’al ti’ najilo’ob ts’akyaj, ba’ale’ ma’ j kíimo’obi’.
Beyxan, tu ya’alaj walkila’ mixmáak k’oja’an tumen. Ts’o’okole’, ti’al ma’ u seen múuch’ul máake’, lalaj 21 k’iino’ob ku béeytal u xíimbalta’al máak te’elo’, lalaj fiin de semanáa.
“Lalaj sábadoe’ ku yokol u láak’ máaxo’ob ma’ jets’a’ak u si’ipili’, yéetel domingose’ máaxo’ob ts’o’ok u je’ets’el. Ti’ le uláak’ 21 k’iino’ob ku taale’, kúulpach túun u beeta’al… ma’alob u jóok’ol to’on ba’al wa k beetik beta’, tumen beyo’ mixmáak sajbe’entsil u kuxtal”, tu ya’alaj.
Te’e kúuchil walkila’, maanal mil 200 u túul máak k’ala’ani’.
