U lu’umilo’ob u petenil Yucatáne’ ti’ yaan ichil le lajunp’éelo’ob tu’ux asab yanchaj formaal meyaj ti’ máak, beey úuchik u ya’alal tumen Instituto Mexicano del Seguro Social (IMSS). Quintana Rooe’ ti’ j p’áat tu ka’a kúuchil ichil u tsoolil tu’ux yanchaj meyaj yéetel táakbesa’an máak ti’ IMSS, úuchik u béeykunsik 19.5 por siientoil, chéen tu paach Tabasco, ka’alikil Yucatán ti’ j p’áat ti’ wak kúuchil yéetel Kaanpeche’ tu lajun kúuchil, kex kaabal ti’ u meedyail u yalabil ti’ u péetlu’umilo’ob México.
IMSSe’ tu ts’áaj k’ajóoltbile’ ti’al u k’iinil 31 ti’ diciembre ti’ u ja’abil 2021e’ yanchaj 20 miyoonesil 620 mil 148 u p’éel meyajo’ob ichil tuláakal México, u 87 por siientoil x ma’ xoot’il meyaj yéetel u yalabilo’ chéen ja’ajats k’iino’ob meyaj, kex tumen ti’al u winalil diciembree’ ch’éen u yantal 312 mil 902 u p’éel meyajo’ob, ts’o’okole’ le je’elo’ tu chíikbesaj u 1.5 por siientoil éemij.
Beyxan mola’ay tu ya’alaje’, le beyka’aj meyajo’ob yaane’ ka’anal yanchaj ti’ le beyka’aj yaan ma’ili’ k’áajak pak’be’en k’oja’anil, ts’o’okole’ ka’alikil táane’ xoka’ab u jach ya’abil aj meyajo’ob ts’íibta’an u k’aaba’ te’e IMSSo’, tumen 4.3 por siientoil u taasail le ja’abo’.
Tabasco, Baja California Sur yéetel Quintana Roo tu píitmáanso’ob 12 por siiento, le beetik le ts’ook péetlu’uma’ p’áat tu ka’a kúuchil ichil le lu’umo’ob tu’ux asab ya’abchaj u póorsentajeil u yantal formaal meyaj ichil jump’éel ja’ab.
Tabasco jo’olint u tsoolil péetlu’umo’on, tumen yanchaj u 20.5 por siientoil; yáanale’ ti’ yaan Quintana Roo, úuchik u yantal 19.5; ts’o’okole’ Baja California Sur 11.8, Nayarit 9.4, Hidalgo 9.1, yéetel tu wak kúuchil Yucatán tumen yanchaj ti’ 8.1; tu paache’ Baja California 7.1, Chiapas 6.4, Querétaro 5.9 yéetel Kaanpech, tu’ux yanchaj 5.9 por siiento.
Le miércoles máaniko’, ti’ k’a’aytajil tsikbal beeta’abe’, u meyajnáalil Secretaria del Trabajo y Previsión Social de Quintana Roo, Catalina Portillo Navarro, tu ts’áaj k’ajóoltbile’ ti’al u ts’ook óoxp’éel winalo’ob ti’ u ja’abil 2021 ti’ le péetlu’umo’ ts’o’ok u yantal 15 mil 825 u p’éel meyajo’obi’, le je’ela’ ku ye’esike’ 355 por siientoil úuchik u píitmáansa’al ti’ le beyka’aj yaan ka’acho’, le beetik yanchaj uláak’ 76 mil 265 u p’éelal.
Xak'alutskíinsa'an tumen: Sasil Sánchez Chan
