Le ts’ook k’iino’oba’, tu kúuchik u jáayal yéetel u líik’il péepen k’áak’ tu noj kaajil Cancúne’, k’a’ayta’ab u yantal u chan je’elel tumen ti’ u aj meyajilo’obe’ páak’ u k’oja’anil Covid-19. Le sábado máaniko’, te’e kúuchilo’, káanselarta’ab 24 u p’éel bueelos kun beetbil ka’ach tumen mola’ayo’ob yaan te’elo’, u ya’abile’ Aeroméxico beetej.
Ichil ba’ax j ts’a’ab k’ajóoltbil tumen Aeropuertos del Sureste (Asur), ti’ le 24 buuelos ma’ líik’ le sábado máanika’, yanchaj uláak’ tu k’iinil domingo, ba’ale’ tak bejla’a lunes kéen ojéelta’ak beyka’aj yanchaj u je’elsa’ali’.
También te puede interesar: Por brote de Covid-19, cancelan y retrasan vuelos en Cancún
Tu kúuchil Internet Aeroméxicoe’ tu k’a’aytaj, le domingo máanika’, u je’elsik péepen k’áak’ yaan ka’ach u jáayal wa yaan ka’ach u kóojol Cancún: wakp’éele’ yaan ka’ach u bin Ciudad de México, le yaan u xookolil 559, 561, 563, 519, 559, 535, yéetel óoxp’éele’ ti’ u taal ka’ach te’e noj kaajo’, ti’al u kóojol Cancún, leti’e’ yaan u xookolil 500, 540, 516.
Beey túuno’, ti’al bejla’a’ lunese’, mola’aye’ ts’o’okili’ u k’a’aytik yaanili’ u je’elsik uláak’ waxakp’éel buuelos: Cancún tak Ciudad de México le yaan u xookolil 509, 535, 527 yéetel 545; y CDMX tak Cancún, le yaan u xookolil 516, 508, 536 yéetel 528.
U múuch’kabil Asociación Sindical de Pilotos Aviadores de México (ASPA) tu k’a’aytaje’ ichil mola’ayo’ob tu’ux yanchaj aj meyajo’ob páak’ ti’ob le k’oja’ana’, ti’ yaan Aeromar, Aeroméxico yéetel Aeroméxico Connect, tu’ux náak óoli’ 100 u túul máak k’oja’ani’.
Xak'alutskíinsa'an tumen: Sasil Sánchez Chan
