Ichil tuláakal yóok’ol kaabe’, u noj lu’umil Méxicoe’ leti’e’ tu’ux asab ya’ab u beetik u yantal póornografia, ts’o’okole’ Estados Unidose’ leti’e’ yáax lu’um k’a’abéetkunsik, le beetike’, tu ka’ap’éel noj lu’umo’obe’ tu nup’ajubáajo’ob ti’al u kaxtiko’ob ka xu’uluk le k’aasil ba’ala’.
Le lunes máanika’, tu noj kaajil Cancún, beeta’ab u mokts’íibil meyaj ti’al u kaxta’al ka ch’éenek u jóok’sa’al sexual ba’al ti’ paalal. U ti’al mokt’aane’ táakpaj u jala’achil péetlu’um, méek’tankaaj, kaaj yéetel u jala’achil Estados Unidos.
Te’e súutuko’, ma’ili’ je’ets’ek mokt’aane’, j ts’a’ab u cha’anil Sonido de Libertad, beeta’an tumen Eduardo Verastegui, ikil táan u beetik xíimbal meyaj ti’al u xu’ulsa’al traata 2022, tu’ux táan u xakta’al u xíimbalta’al tuláakal u noj lu’umil México, ti’al u yila’al u yantal u ya’abil máak ka ba’atelnak yóok’lal jáalk’abil.
También te puede interesar: QRoo une fuerzas con EU para erradicar la explotación sexual infantil
“Maanal jump’éel ja’ab káajak k máan k beet tsikbalo’ob yéetel Eduardo, le beetik xane’ káaj u beeta’al meyajo’ob ts’o’ok u beetik uts… ba’ale’ unaj u meyaj tuláakal máak ti’al ka ch’éenek le k’aasila’”, tu ya’alaj u jala’achil Quintana Roo, Carlos Joaquín González.
Leti’e’ tu chíimpoltaj u k’a’ananil u beeta’al mokt’aano’ob je’el bix le je’ela’, tumen jump’éel ti’ le noj talamilo’ob yaan ichil sexual koonol tu lu’umil México yéetel Estados Unidose’, ku yúuchul tumen Caribee’ leti’e’ tu’us asab ya’ab u kóojol aj xíinximbal máako’ob, le beetik unaj u yantal múul meyaj.
“K meyaj beey jala’ache’, leti’e’ k mu’uk’ankúunsik meyaj ku beeta’al ti’al u xu’ulsa’al u ko’onol wíinik, ba’ale’ beyxan ti’al ma’ u yantal tuusil meyaj. Le múul meyaj ku mokt’anpajala’, u chíikulal ti’al k e’esike’, k k’áat ka xu’uluk le k’aasila’”, tu ya’alaj.
Quintana Rooe’ leti’e’ yáax péetlu’um mokts’íibtik le ju’una’, ba’ale’ u tuukulile’ ka beeta’ak ichil tuláakal u noj lu’umil México. Le beetike’ yaan u táakpajal u múuch’kabilo’ob Freedom yéetel Viva México.
Eduardo Verástegui, máax jo’olbesik u péeksajil Viva México, tu ya’alaje’, u péetlu’umil Quintana Rooe’ tu jets’aj u t’aan ti’al u yantal múul meyaj yéetel u jala’achil Estados Unidos ti’al u ch’éenel u yúuchul le talamila’.
Ichil ba’ax j ts’a’ab k’ajóoltbil te’e súutuko’, lalaj ka’ap’éel oorae’, waktúul x ch’úupalal yéetel xi’ipalale’ ku ch’a’abalo’ob ti’al u yoksa’alo’ob ich traata. Naciones Unidas ku ya’alik xane’, 30 por siiento máaxo’ob ku loobilta’ale’ xi’ipalal, yéetel le uláak’ 70 por siientoile’ x ch’úupalal yéetel ko’olel.
Xak'alutskíinsa'an tumen: Sasil Sánchez Chan
