Tu jo’oloj ka’ap’éel ja’ab yéetel uláak’ óoxp’éel winal ma’ yanak máax jo’olbesik Secretaría General Comité Ejecutivo Nacional (CEN) ti’alinta’an tumen Sindicato de Trabajadores Petroleros de la República Mexicana (STPRM), úuchik u p’ata’al tumen Carlos Romero Deschampse’, yaan u yéeya’al túumben aj jo’olbesajil yéetel u yáantajil jump’éel nu’ukbesajil séelular ti’al u túuxta’al yéeyajilo’ob.
Úuchik u ts’o’okol yéeyajil ichil u 36 Secciones Localesil yaan ti’ le múuch’kabilo’, ichil tuláakal u noj lu’umil Méxicoe’, je’ets’ tu k’iinil 7 ti’ diciembre ti’ u ja’abil 2021e’, u páayt’aanil u yéeya’al máax kun jo’olbesik u Secretaría Generalil CEN ti’alinta’an tumen STPRM.
Ti’al le yéeytambala’, tu ts’íibtaj u k’aaba’ 25 u túul máak. Ts’o’okole’ chéen le aj meyajo’ob táakano’ob te’e múuch’il ku béeytal u táakpajalo’obo’, tumen unaj tu ts’íibtaj u k’aaba’ob te’e pláataformao’, ti’al beyo’ u páajtal u ts’a’abal jump’éel nip, chéen ba’axe’ ma’ xoka’an jaytúul wa beyka’aj ti’ leti’ob tu ts’íibtaj u k’aaba’i’. ba’ale’ ichil u jaats yéeyajil Carmene’ yaan kex 6 mil 972 u túul aj meyajo’ob.
También te puede interesar: Este lunes son las votaciones para nuevo líder sindical de Pemex
Ichil ba’ax jets’a’ab te’e páayt’aan jóok’sa’abo’, a’alabe’ chéen aj meyajo’ob tu ts’íibtaj u k’aaba’ te’e plataformao’ yaan u páajtal u táakbesikubáaj te’e yéeytambalo’, ba’ale’ tumen jóok’ u tsikbalil a’alik táan u talamkúunsa’al u táakpajal máake’, cha’ab u beeta’al tak tu k’iinil 29 ti’ enero. Kex beyo’, máaxo’ob táakan ichil STPRM tu ya’alajo’obe’ chéen 70 por siiento ti’ leti’ob béeychaj u yokolo’obi’.
U nu’ukbesajil tu’ux kun beetbil le yéeytambalo’ yaan u je’ebel láas 00:00 ooráas ti’ le lunes 31 ti’ eneroa’ yéetel yaan u k’a’alal láas 6 táan u taal u yáak’abtal. Yaan u páajtal u yokol máak tu séelular wa je’el ba’axak kóomputadora yaan Internet ti’.
Xak'alutskíinsa'an tumen: Sasil Sánchez Chan