Ti’al u ts’o’okol u k’u’ubul xoknáalo’ob ti’al u yáax ja’abil primaria beyxan ti’al 2° yéetel 3° ti’ preescolar, káajsa’ab ti’al u ts’o’okbal le ja’ab máaniko’, taatatsilo’obe’ ku páajtal u ts’o’oksiko’ob díijital wa te’e najilo’ob xooko’.
Daniel Aguilar Faisal, máax jo’olbesik Departamento de Estadística ti’ u mola’ayil Secretaría de Educación del Gobierno del Estado de Yucatán (Segey), tu ts’áaj k’ajóoltbile’ k’a’anan u yila’al ba’ax ts’o’ok u je’ets’el ti páayt’aan yáax beeta’ab (www.preinsripciones.segey.gob.mx), ti’al u yila’al tu’ux najil xook j ts’a’ab le paalo’.
Ti’al u ts’o’oksa’al u k’uba’al paale’, u taatsilo’obe’ unaj u túuxtiko’ob kóoreo ti’ máax jo’olbesik najil xook wa u bino’ob ti’al u beetiko’ob ba’ax ku k’áata’al ti’ob. Beey túuno’, ti’al u xoknáalilo’ob preescolar yéetel primariae’ u ts’ook k’iinil u beeta’ale’ 16 ti’ febrero, ka’alikil ti’al u xoknáalilo’ob secundariae’ u ts’a’abal k’ajóoltbil ba’ax chíikpaj ti’ páayt’aane’ yaan u k’a’aytal 9 ti’ junio, yéetel u ts’o’oksal u k’u’ubul xoknáalo’obe’ yaan u beeta’al 10 tak 17 ti’ junio.
También te puede interesar: Inscripción para Prescolar y Primaria culmina el 16 de febrero
Máax ma’ táan u ts’o’oksik u beetik ba’al ku k’áata’ale’, ma’ táan u yoksa’al te’e najil xooko’. Beyxan a’alabe’, u ja’abil xook 2022-2023e’, máaxo’ob jo’olbesik náajilo’ob xooke’ yaan u k’áatiko’ob u ts’ook ju’unilo’ob ti’al u ts’o’oksa’al tuláakal.
Aguilar Faisal tu ya’alaje’, ti’ tuláakal paalal yaan u kúuchil te’ najil xooko’. Ts’o’okole’ wa ku yantal wa máax taak u k’exik najil xook tu’ux ts’a’abe’, yaan u k’a’abéetal u xak’alta’al wa láayli’ yaan kuupóo p’aatal te’e tu’ux taak u k’exa’al le paalo’, yéetel ku páajtal u yila’al láayli’ ti’ Internet, kéen ts’o’okoke’ unaj u túuxta’al kóorreo te’e najil xook yéeya’abo’.
U mola’ayil kaambale’ ku páayt’antik kaaj ti’al u xak’altik k’a’aytajil kéen u beet ti’ u reedesil.
Xak'alutskíinsa'an tumen: Sasil Sánchez Chan
