Ikil táan u ko’ojtal xan u tojol ba’ax ku k’a’abéetchajal ti’al u beeta’al juuch’ yéetel waaje’, je’el bix xan u bo’otal sáasile’, máaxo’ob táakano’ob ichil Cámara de la Industria de la Masa y la Tortillera, jo’olbesa’anob tumen Javier González Baqueiro yéetel Carmelo Salvador, tu k’a’aytajo’obe’ yaan u ya’abtal le bajux ku bo’otal yóok’lal le janabe’enbalo’oba’. Jun peso kun na’akal. Ba’ale’ le k’ajóolta’ano’ob beey mototortillerose’ yaan u na’aksiko’ob dos pesos, kex tumen tu mokt’antajo’ob yéetel u jo’olpóopilo’ob kaaje’ ma’ táan u páajtal u k’ubiko’ob jump’éel kiilo chuka’an.
Ka’alikil tu much’ajubáajo’ob tu táan kaancha, tu táan kex 300 mototortilleros yéetel kex 40 éempresariose’, j ts’a’ab k’ajóoltbil u ko’ojtal u ma’anal le waaj yéetel le juuch’o’ táan u yúuchul tumen u jala’achilo’ob u noj lu’umil Méxicoe’ ma’ tu núukajo’ob mix ba’al úuchak u kaxta’lo’ob ti’al u ts’aatáanta’al talamilo’ob ku máansiko’ob máax ku meyajtiko’ob le je’ela’, ikil u seen na’akal xan u bo’olil sáasil yéetel gas LP.
Beyxan, tu jach chíikbesajo’obe’, mola’ayob konik áarinae’ ma’ xan ch’éenek u seen ko’ojkinsiko’ob u koonolo’ob, tumen tu ja’abil 2021, kex táan pak’be’en k’oja’ane’, kantéen úuchik u ko’ojtal áarina, “mantats’ u ko’ojtal, ts’o’okole’ to’one’ je’el bixake’ k ilik bix k bo’otik, ba’ale’ to’one’ ma’ táan u páajtak k ko’ojkinsik k koonol tumen k k’e’eyel tumen Procuraduría Federal del Consumidor (Profeco)”, tu tsibkaltaj González Baqueiro.
Le beetike’, chéen jun peso kun ko’ojkinsbil le waaj ti’al máaxo’ob ku bino’ob tak molino, ba’ale’ máaxo’ob ku maano’ob tu jool u yotocho’obe’ yaan u yantal u ko’ojkíinsiko’ob dos pesos, tumen le máaxo’ob ku maan koonole’ u ts’íibtmaj u k’aaba’ob tu táan Ayuntamiento de Campeche, le beetike’, wa ma’ tu beeta’al beyo’, ma’ kéet kéen úuchuk le koonolo’, tumen yaan ti’ le je’elo’obo’, ku máano’ob koonol chéen beyo’, kex mina’an ti’ob u permisoil u beetiko’obi’.
Xak'alutskíinsa'an tumen: Sasil Sánchez Chan
