de

del

Foto: Rodrigo Díaz Guzmán

Ka’aj ts’o’ok u beeta’al líiik’saj t’aan tumen xoknáalo’obe’, u noj najil xook Universidad Autónoma de Yucatán (UADY) tu páayt’antaj máaxo’ob tu yu’ubajo’ob loobilta’abo’obe’ ka yanak u beetiko’ob tak pool je’el bix tsola’an unaj u beeta’al tumen le najil xooko’.  

Ba’ale’, kex beyo’, ma’ tu ya’alajo’ob wa yaan u k’áatiko’ob ka sa’atbeas’ak u si’ipil tu táan kaaj, mix wa yaan xan u ts’áako’ob ka’ansajil ti’ máaxo’ob  ku meyajo’ob te’elo’, ichil ba’alo’ob yaan ba’al u yil yéetel u páajtalil wíinik, beyxan u jejeláasil óol wíinik, je’el bix úuchik u k’áata’al tumen xoknáalo’ob tu líik’saj u t’aano’ob. 

Je’el bix j ts’a’ab k’ajóoltbil jo’oljeake’, yanchaj u jejeláasil u xoknáailo’ob Preparatoria Uno, je’el bix xan uláak’ máako’ob, tu líik’saj u t’aano’ob tu jool le najil xooko’, tumen ma’ ki’imak u yóolo’ob yéetel péech’ óol yanchaj te’elo’, tumen e’esa’ab u p’eekil máaxo’ob yaanal bix u yóolo’ob; le beetik k’áaya’abe’ ka yanak u k’áata’al ka sa’atbesa’ak u si’ipil le najil xooko’.

 

También te puede interesar: Tras manifestación, UADY invita a los estudiantes a utilizar vías institucionales

 

Beyxan, tu k’áatajo’ob ka ka’ansak máaxo’ob ku meyajo’ob te’elo’, ti’al u je’ets’el ba’ax unaj u beeta’al ti’al ka utsil yanak kúuchilo’ob ti’al tuláakal máak, je’el bix xan u yantal kaambalil ba’ale’ tu’ux ma’ u je’ets’el u kuuch uláak’ ba’alo’ob yáax jets’a’an tumen kaaj, mix jela’an tuukulo’ob.

Le beetike’ le 17 ti’ febrero máanika’, najil xooke’ tu ts’áaj k’ajóoltbil ba’ax ku núukik yóok’lal ba’ax úuchik, le beetik tu ya’alajo’obe’ ku chíimpoltiko’ob u jejeláasil óol, tuukul yéetel políitikáa ti’ máaxo’ob yano’ob te’elo’.

“Le beetike’, yaan k mu’uk’ankúunsik k óol ti’al k táakbesik máak ichil u jejeláasil u múuch’il kaaj tu’ux k péek”, a’alabij.

Beyxan, yóok’lal líik’sajil t’aan beeta’abe’, páayt’anta’ab xoknáalo’ob ti’al u beetiko’ob tak pool tu táan le mola’ayo’, ti’al beyo’ u páajtal u ts’aatáanta’al je’el bix jets’a’an unaj u beeta’al ichil u páajtalil wíinik. 

Xak'alutskíinsa'an tumen: Sasil Sánchez Chan