Jo’oljeak, u yáax k’iinil marzo, máan Día de la Cero Discriminación; yóok’lale’ te’e ja’aba’ péektsilta’ab u tuukilil “ko’one’ex tselik a’almajt’aano’ob ma’ tu yáantik kaaji’, ko’one’ex beet a’alamajt’aano’ob mu’uk’ankúusik”. Ba’ale’ u k’ananil ba’ax úuche’, leti’ úuchik u chíimpolta’al tumen Congreso del Estado de Yucatán k’eexilo’ob beeta’ab ti’ xa’ayil a’almajt’aano’ob je’ets’ ti’al u yantal ba’ax k’ajóolta’an beey matrimonio igualitario.
Mola’ay jet’sik a’almajt’aano’obe’ tu éejentaj ka k’e’exek Código de Familia beyxan Ley del Registro Civil, tu ka’ap’éelil ch’a’anukta’an tumen u péetlu’umil Yucatán, ti’al u páajtal u ts’o’okol u beel xiib yéetel xiib, wa ko’olel yéetel ko’olel.
También te puede interesar: Aprueban las leyes secundarias del matrimonio igualitario en Yucatán
U yutsile’, jumpuul úuchik u éejenta’al le k’eexila’. Ka’ache’, le máaxo’ob ku yóotik u ts’o’okol u beel yéetel u yéet xiibil wa ko’olele’, ku yantal u k’áatiko’ob áamparos ti’al u béeytal. Walkila’, chéen táan u binetik ka je’ets’ek ich Diario Oficial del Estado ti’al u káajal u chíimpolta’al tumen péetlu’um.
Ba’ax k’eexilo’ob beeta’abij
Ichil Código de Familia, yanchaj óox jaats a’almajt’aan k’e’exij. Ichil Ley del Registro Civile’, uláak’ óoxp’éel, yéetel le je’elo’oba’ ku káajal u chíimpolta’al u páajtalil ti’al u yutsil kuxtal LGBTTTI kaaj.
U Artículo 10 yaan ich Código de Familia ku xo’okol walkila’, mina’an u jela’anil wíinik tu táan a’almajt’aan, ts’o’okole’ tuláakal máak yaan u páajtalil u jets’ik bix u k’áat ka yanak u láak’o’ob, je’el bix xan u jets’ik bix kéen u k’a’abéetkuns u ba’alumbáaj.
Tu jaatsil 49e’, ku je’ets’el ts’o’okol beele’, jump’éel ba’al chíimpolta’al tumen a’almajt’aan yéetel ku yúuchul ichil ka’atúul wíinik, ba’ale’ ku chíimpolta’al kéet kuxtal ichil ba’ax yaan u yil yéetel u páajtalil yéetel ba’ax najmal u beetik ti’al páajtal u jáalk’ab nupikubáaj máak ichil táan óolal yéetel múul áantaj.
Beyxan, ichil u jaatsil 201e’, ku je’ets’el múul kuxtale’, ku yúuchul kéen núupuk ka’atúul wíinik, ti’al u múul yantalo’ob, yanak, wa ma’, u paalal.
Ichil u a’almajt’aanil Registro Civile’, tu jaatsil 22e’, ku ch’a’achibta’al u k’aaba’, u chuka’an k’aaba’, u beejil u yotoch yéetel máakalmáak u lu’umil máak ku síijil; ichil u jaatsil 26’ ku je’ets’ele’, je’el máaxak ka yanak u paalale’ ku páajtal u ts’áak ojéeltbil ts’o’ok u yantal u paalal. Beyxan, tu jaatsil 64e’ yaan u páajtal u je’ets’el u k’aaba’ máax yéetel kun ts’o’okol u beel le wa máaxo’.
Xak'alutskíinsa'an tumen: Sasil Sánchez Chan
