U Congresoil u péetlu’umil Quintana Rooe’, tu jets’aj ka yanak u ts’íibta’al u k’aaba’ María Petrona Uicab tu pak’in táan óol yaan ichil Poder Legislativo, ts’o’okole’ u ts’a’abal le k’aaba’ te’elo’ yaan u táakmuk’tik túumben jeets’il beeta’an, ti’al u k’u’ubul u chíimpolalil Medalla al Mérito Mujer Indígena Maya.
Yóok’lal le je’ela’, Sofía Marisol Berlín Villafaña, máax jo’olbesik Colectivo María Uicab, tu ya’alaje’, tu jo’oloj ya’abach noj meyaje’ táan u káajal u chíimpolta’al le k’a’anan ko’olelea’, máax tu jo’olbesaj ajk’atuno’ob tu noj kaajil Tulum.
Tu ya’alaj xane’, Maríae’ k’a’anan ti’al kaaj, yéetel u béeytal u chíimpolta’al tu winalil septiembre ti’ le ja’ab yaniko’ona’ noj ba’al xan tumen táaka’an ichil le lajun ja’abil meyaj káajsa’an yóok’lal u máasewal t’aanilo’ob yóok’ol kaab, tumen yaan u chíimpolta’al ko’olel, máax béeykunsik u ka’anal t’aan yéetel miatsil ichil u jeel máko’ob.
También te puede interesar: Reconocerán a María Petrona Uicab en muro de honor del Congreso de QRoo
Uláak’ ba’ale’, táan xan u chíimpolta’al tuláakal u maaya ko’olelilo’ob Quintana Roo, tumen láayli’ chíikano’ob ichil u k’ajla’ayil le péetlu’umo’. “U múuch’kabil María Uicabe’ jach táaj ki’imak u yóol yéetel ba’ax je’ets’ tumen Congreso del Estado, ti’al u táakbesa’al yéetel u woojil ooro, tu pak’il le kúuchilo’, u chíikulal le k’a’anan ko’olel kuxlaj tu sigloil XIX, ka’alikil úuch xan U Ba’ateltáambalil Castas. Le beetik, noj chíimpolal, tumen táan u yúuchul múul xíimbal ti’al u ye’esa’al u k’a’ananil máasewal ko’olel ich u kuxtal kaajo’ob”, tu ya’alaj.
Beyxan, ba’ax pa’ta’ab tumen u yaal Muyile’, yaan u p’áatal ich kaaj tak tu paachil k’iin, tumen yaan u je’ets’el u k’aaba’ te’e kúuchilo’, le beetik pa’at u k’aaba’ beey “U x-ajawil Tulum” ichil “U Ba’ateltáambalil Castas”, ti’al beyo’, ma’ u sa’atal ba’ax tu beetaj, yéetel ti’al xan u péeksik u yóol uláak’ ko’olelo’ob tu kaajil Tulum, ba’ale’ beyxan ti’ yóok’ol kaab.
Xak'alutskíinsa'an tumen: Sasil Sánchez Chan