de

del

Tse’el úuchben mexicoil nu’ukul táan ka’ach u ko’onol Austria

Retiran pieza arqueológica mexicana de una subasta en Austria
Foto: Twitter @SRE_mx

Jump’éel úuchben mexikoil nu’ukule’ tse’el ichil u pikilju’unil koonol tukulta’an u k’a’aytal bejla’a 11 ti’ marzo tu kúuchil Galería Zacke, tu noj lu’umil Austria, beey tu ts’áaj k’ajóoltbil u éembajadail México ti’ le europeoil lu’umo’. 

A’alabe’, le nu’ukulo’ jump’éel yugo beeta’ab yéetel tuunich, tu’ux ku chíikpajal juntúul ba’al, yéetle beeta’ab tu jáal ja’il Golfo ichil u jatsk’iinil Clásico mesoamericano (400-900 d. C.), yéetel ku jach chíikbesik Clásico Central veracruzano.

Ka’aj túun ojéelta’ab tumen éembajada ba’ax ku yúuchule’, t’aanaj yéetel le tu’ux ku beeta’al le koonolo’, ti’al u tsolik ba’ax ku tukultik México tu yóok’lal u ko’onol úuchben nu’ukulo’ob ich táanxel lu’umo’ob.   

Le miércolesa’, u mola’ayil Secretaría de Cultura tu lu’umil Méxicoe’ ts’o’ok ka’ach u k’áatik ti’ europeoil lu’umo’obe’ ka je’elsa’ak u ko’onol nu’ukulo’ob yaan ka’ach u beeta’al España, Austria, Bélgica yéetel Francia ichil u k’iinil 10 yéetel 18 ti’ marzo.

 

También te puede interesar: Retiran pieza arqueológica mexicana de una subasta en Austria

 

Ichil koonol táan u beeta’al tumen Galería Setdarte’ ts’o’ok u yila’al yaan 35 mexikoil nu’ukul meyajnaj ichil siiglo XVII tak IX; ichil koonol "Vente aux enchères de beaux arts et d'antiquités" beeta’an tumen Carlo Bonte Auction yaan óoxp’éel úuchben nu’ukul estilo Comala, unaj u ti’al ui péetlu’umil Colima.

Beyxan, ichil u koonol "Collection Evrard de Rouvre et Van Den Broek D'obrenan", ku beeta’al tumen Casa Ader, ila’abe’ yaan uláak’ 74 u p’éel nu’ukuli’. 

Ichil u yáax óoxp’éel ja’abil meyaj mexikoil jala’ache’ tu tokaj ti’ uláak’ táanxel lu’umo’obe’ maanal 5 mil 700 nu’ukulo’ob chíimpolta’an beey u ba’alumbáaj le lu’uma’. Le beetike’, jala’ach Andrés Manuel López Obrador, u ts’aatáantmaj ka ila’ak ba’ax kun beetbil ti’al u su’utul tu’ux unaj yaan. 

Yéetel u nu’ukbesajil #MiPatrimonioNoSeVende, u noj lu’umil Méxicoe’ táan u kaxtik ka na’atak nu’ukulo’obe’ ma’ chéen ti’al jats’utskúunaji’, mix xan chéen ayiik’al ba’al, u jaajile’ nu’ukulo’ob chíikbesik miatsil yéetel u k’ajla’ayil máasewal kaajo’ob.  

“Meyaje’ ts’o’ok u béeykunsik ka súutuk u yich u jo’olpóopilo’ob miatsil yaan u táakpajalo’ob Conferencia Mundial sobre las Políticas Culturales (Mondiacult) 2022, yaan u beeta’al México ichil 28 tak 31 ti’ septiembre ti’ le ja’ab yaniko’ona’, tu’ux yaan u ch’a’ajolta’al u tiskbalil u kaláanta’al yéetel u to’okol u ba’alumbáaj lu’um”, beey a’alab tumen mola’ay.  

Xak'alutskíinsa'an tumen: Sasil Sánchez Chan