de

del

Foto: Facebook Irais Barón

U jala’achil u lu’umil Yucatáne’, tu péeksiltaj ka beeta’ak u múuch’tambalil mola’ayo’ob tu’ux k’a’ayta’ab ba’axo’ob jejeláas meyaj yaan tu’ux ku páajtal u táakbesa’al ko’olel ichil le kúuchilo’obo’. Nu’ukbesaje’ tu k’aaba’taj Feria Nacional de Empleo para la Inclusión Laboral de las Mujeres 2022; yanchaj 400 u p’éel kúuchilo’ob táan u kaxta’al u yuumil, ichil 30 u p’éel mola’ayo’ob.

Le meyeja’, táakbesa’an úuchik u máan u winalil ko’olel, ti’al u ts’a’abal u jeel kúuchilo’ob tu’ux ka béeyak u meyaj ko’olel, tumen leti’e’ láayli’ k’a’anan ti’al u ch’a’ajolta’al náajal taak’in, tu jo’oloj káajak u pak’be’en k’oja’anil Covid-19.

Máax jo’olbesik Secretaría de Fomento Económico y Trabajo (Sefoet), Ernesto Herrera Novelo, leti’ máax chúuns le meyajila’, tu kúuchil Cámara Nacional de Comercio, Servicios y Turismo (Canaco-Servytur), tu’ux k’a’ayta’ab meyajo’ob ku bo’ota’al tak ichil 6 mil 500 yéetel 20 mil pesos; uláak’ teeknikóo meyajo’ob bo’ota’an ichil 6 mil tak 18 mil pesos, yéetel óoperatibo meyaje’, ichil 5 mil 259 tak 12 mil 800.

 

También te puede interesar: Realizan en Yucatán feria de empleo para la inclusión laboral de las mujeres

 

Herrera Novelo tu ya’alaje’, kex tumen le múuch’tambalo’ u ti’al u kaxtik meyaj ko’olele’, beeta’an xan ti’al u táakpajal máax yaan ti’ díiskpasidaad yéetel máax ts’o’ok u ch’íijil, tumen u ya’abil mola’ayob táakpaje’, táan u kaxtik u táakbesik óoli’ je’el máaxak ka k’a’abéetchaja ti’ meyaj.

“Juntéenake’, in waale’ wey tu kaxtaj meyaje’; jach k’a’anan ktáakbesa’al ichil u yuumil máax ku kaxta’al ti’al le meyajo’”, tu tsikbaltaj Patricia Juárez Reyes, juntúul ti’ le ko’olel yáax k’uch te’elo’.

Ichil mola’ayob táakpajo’obe’ ti’ yanchaj: Casa Zante, Comercializadora Michelle, Infocomm, Abarrotera del Duero, Financiera Independencia (Findep), Hotel Fiesta Americana, Niplito, Coppel, Total Play Telecomunicaciones, Cervezas Modelo del Sureste yéetel Hotel Wyndham Mérida.

Beyxan, Corporativo Mayorista Peninsular Coma, Medicamentos Populares del Bazar, Dunosusa, Maxieventos, Walmart de México, Mexpress Alliance, Grupo Covi, Grupo Enerkom, Distribuidora Liverpool, Petromérida, Sigma Alimentos, Iassa, Burgos México yéetel Súper Delis, ichil uláak’o’ob. 


Xak'alutskíinsa'an tumen: Sasil Sánchez Chan