Ku tukulta’ale’ je’el u yokol náajal tak yóok’il 31 miyoonesil pesos tu kaajilo’ob Kaanpech, Carmen yéetel Calakmul ti’al u xíimbaltbil. Mauricio Arceo Piña, máax jo’olbesik Secretaría de Turismo (Sectur) ti’ u péetlu’umil Kaapneche’, tu ya’alaj táan u páa’ta’al ka k’uchuk kex 14 mil ajxíinximbal máako’ob ti’ u lu’umil México yéetel uláak’ táanxel kajilo’ob, yóok’lal u k’iinilo’ob je’elil.
Arceo Piñae’ tu ts’áaj k’ajóoltbile’, ti’al u noj kaajil San Franscisco de Campechee’ táan u páa’ta’al u k’a’abéetkunsa’al kúuchilo’ob u wulabkúunsa’al máak yóok’ol u 56 por siientoil tu k’iinilo’ob Semana Santa (ka’ap’éel p’isk’iin); beyxan uláak’ k’a’anan kaajo’obe’ Calakmul yéetel Isla Aguada, tumen te’elo’ ojéela’an ts’o’ok u k’a’abéetkunsa’al u 90 por siientoil kúuchilo’ob yaan, ba’ale’ tumen yaan xan uláak’ kaajo’ob ku xíimbalta’al je’el bix Champotón, Calkiní yéetel Candelaria, tumen láayli’ u k’a’aytalo’ob ma’alobtak ti’al xíimbaltbil.
Tu tsikbaltaj te’e péetlu’umo’ yaan 296 u p’éel otelo’ob yéetel 8 mil 390 kuaartos. Ti’ le je’elo’obo’, tu kaajil Calakmule’ yaan 379 kuaartos ti’ 29 u p’éel otelo’ob, ka’alikil tu kaajil Isla Aguadae’ yaan 147 kuaartos ti’ 14 u p’éel otelo’ob, le ts’ook kaajila’ chíimpolta’an beey Pueblo Mágico. Yóok’lal túun le je’ela’, tu k’iinilo’ob Semana Santae’ ku páa’ta’al u yokol 31 miyonesil pesos.
También te puede interesar: Campeche espera 14 mil visitantes en las dos semanas de vacaciones
Beey túuno’, ichil uláak’ ba’alo’obe’, jts’a’ab k’ajóoltbil uláak’ meyajo’ob táan u taal u beeta’al tumen Secretaría de Turismo, je’el bix ka táakbesa’ak péetlu’um ti’ uláak’ cha’anilo’ob ku beeta’al tu noj lu’umil México, beyxan táanxel kaajo’ob, je’el bix Tianguis Turístico de Pueblos Mágicos tu noj kaajil Barcelona, Sea Trade Global Cruise, tu kaajil Miami yéetel Tianguis Turísticos de México, tu kaajil Acapulco.
Le beetike’, tu ts’áajo’ob k’ajóoltbil u nu’ukbesajil u túumbenkúunsa’al ba’ax ku páajtal u cha’antal te’e kaajo’obo’, je’el bix u ts’a’abal u koodigosil QR, ti’al u yokol máak tu kúuchil Internet campeche.travel tu’ux ku páajtal u yojéelta’al uláak’ kaajo’ob yéetel kúuchilo’ob je’el u yutstal u cha’antale’.
Máax jo’olbesik Secture’, tu tsikbaltaj táan u yantal múul meyaj yéetel Unidad de Comunicación Social del Gobierno del Estado, ti’al u k’a’ayta’al u jeel kaajo’ob yaan ti’al cha’antbil tu lu’umil Kaanpech.
Xak'alutskíinsa'an tumen: Sasil Sánchez Chan
