Ch’íich’ k’ajóolta’an beey chipe amarilloe’ yaan kex 43 u jejeláas láak’tsilil, ichilo’obe’ ti’ yaan le k’ajóolta’an xan beey chipe manglero, juntúul ch’íich’ k’ajóolta’an tumen kaja’an tu’ux yaan chakte’ob, tu Petenil Yucatán, “bejla’e’ ya’ab u k’askúunta’al chakte’ob, ts’o’okole’ wa ktukultik beyka’aj u beeta’ale’, lalaj ja’abe’ ku k’astal ichil jump’éel tak óoxp’éel por siientoil ti’ le chakte’ob yaan te’e patenila’, le beetik xan u yotoch le ch’íich’o’oba’ ku k’astal”, tu tsikbaltaj Ernesto Gómez Uc, máax jo’olbesik u meyajil u kaláanta’al ch’íich’ ti’ Pronatura Península de Yucatán.
También te puede interesar: Chipe amarillo, otra razón para preservar los manglares
Kex tumen walkil ma’ táaka’an ichil ba’alche’ob sajbe’entsil yanik u ch’éejelo’obe’, Gómez Uce’ ku ya’alik ikil kaja’an tu’ux sajbe’entsil tumen táan u bin u k’askúunta’ale’, je’el xan u beeta’al k’aas ti’.
U k’u’uk’mel ch’íich’e’ chak tu pool yéetel k’aank’an tu tseem, tu’ux xan u wíiwíts’ chíikpajal chaki’, ts’o’okole’ k’a’anan tumen ku ts’áak u p’iis u yantal uláak’ mejen ba’alob, je’el bix k’oxol yéetel ku k’i’itbesik i’inajo’ob.
Xak'alutskíinsa'an tumen: Sasil Sánchez Chan
