Yanchaj kex 40 u túul u ajmeyajilo’ob Dirección de Servicios Públicos Municipales meyajnajo’ob ti’al u mo’olol kex 12 tóoneladasil u ta’il míis yanchaj ichil u k’iinilo’ob Semana Santa, tu baantail Playa Norte, beey úuchik u ts’a’abal k’ajóoltbil tumen máax jo’olbesik le mola’ayo’, Alejandro Guerrero Cabrera.
Tu tsikbaltaje’, meyajo’ob ti’al u mo’olol ba’ale’ káaj tu’ux yaan u kúuchil u báaxta’al ja’, yaan u p’áatal je’ek’abil tak le sábado yéetel domingo ku taala’; ts’o’okole’, láayli’ yaan cha’ano’ob yéetel u jeel ba’alo’ob táan u taal u beeta’al ichil u k’iimbesajil Fiesta del Mar Carmen 2022.
Guerrero Cabrerae’ tu tsikbaltaje’, u jo’olpóopil Carmen, Pablo Gutiérrez Lazarus, leti’e’ máax k’áat ka yanka u beeta’al le meyajo’oba’ ti’al ma’ u yila’al k’aasil tumen ajxíinximbal máako’ob ku kóojolo’ob te’elo’ ka’alikil táan cha’an te’e kaajo’.
También te puede interesar: Recolectan en Carmen cerca de 12 toneladas de basura durante Semana Santa
“Ya’abchaj le beyka’aj nu’ukul ts’a’aban tu kaajil Playa Norte ti’al u pu’ulul ba’al, je’el bix xan ya’abkunsa’ab máaxo’ob ku meyajo’ob Malecón Costero yéetel te’e kúuchilo’ob báaxal ja’, ti’al u máano’ob u kaláant-xíimbalo’ob mantats’ te’elo’ yéetel ti’al u máan u molo’ob ba’ax ku pu’ulul.
Beyxan Guerrero Cabrerae’ tu páayt’antaj kaaj ti’al u ka áantajnako’ob xan, ti’al u pu’ulul ta’ míis tu’ux unaj, tumen beyo’ ma’ táan u yantal u mo’olol kéen ts’o’okok. “Ya’abach tu’ux ku yila’al yaan ba’al pula’ani’; yaane’ tu paache le booteo’, wa te’e mejen bo’oyilo’ob ts’a’aban naats’ ti’ le jáal ja’o’, chéen ba’axe’ lelo’ ku yéek’kunsik le kaajo’, yéetel ku k’askúuntik xan le k’áak’náabo’”.
Uláak’ ba’ale’, tu ya’alaj táan u kaxta’al u beeta’al uláak’ meyajo’ob tumen u jo’olpóopilo’ob le kaajo’, ti’al u yantal uláak’ náaysaj óolo’ob, je’el bix ti’al u beeta’al deeportée, ti’al u péektsilta’al miatsil yéetel báaxalo’ob, ti’al u kóolal uláak’ máako’ob xíimbal tak te’elo’, tumen beyo’, yaan u yantal uláak’ taak’in kun okol te’e méek’tankaajo’, “ba’ale’ k’a’abéet xan u yáantajil kaaj, ti’al u pulko’ob ba’al tu’ux unaj u beeta’al, ma’ yóok’ol bej, mix xan te’e jáal ja’obo’”, tu ts’ook a’alaj.
Xak'alutskíinsa'an tumen: Sasil Sánchez Chan
