Ichil áanalte’ob biinsa’an tumen Fondo de Cultura Económica (FCE) tak edición 30 ti’ u cha’anil Feria Internacional del Libro de La Habana (FILH), yaan ju jóok’sa’al jun jaats ti’al u si’ibil ti’ cubailo’ob, beey úuchik u k’a’aytik Paco Ignacio Taibo II, máax jo’olbesik le mola’ayo’.
Jts’íibe’ tu ya’alaje’ je’el tu’uxak kéen u yil yaan jump’éel u nu’ukbesajil xook, wa jump’éel u najil áanalte’ob óoli’ p’ata’an chéen beyo’, wa tu’ux yaan xoknáalo’ob k’a’abéeti’ob áanalte’obe’ yaan u ts’a’abal jun jaats ti’ le óoli’ 30 mil u p’éel táan u biinsa’al tak te’e petenilo’; cha’ane’ yaan u ts’o’okol le 30 ti’ abril ku taala’, beey jts’a’ab ojéeltbil tumen u kúuchil Internet Cubarte.
Te’e ja’aba’, u noj lu’umil México páayt’anta’an beey país invitado, ichil FILH. Le beetik Taibo II tu tsikbaltaje’, ichil éeditorialo’ob ti’ u lu’umil México táan u táakpajlo’obe’ ti’ yaan El Colegio de México, Instituto Politécnico Nacional yéetel Consejo Nacional de Fomento a la Educación, ts’o’okole’ leti’obe’ tu k’ubajo’ob ichil 150 yéetel 300 u p’éel u áanate’ob, 21 jejeláas u xookilo’obi’.
“Áanalte’ob tu biinsaj México tak Cubae’ yaan u yutstal tu yich cubailo’ob”, tu tsikbaltaj Taibo II, ka’alikil úuchik u k’a’aytik yaan u je’ebel u kúuchil u ko’onol áanalte’ob Tuxpan, ti’alinta’an tumen FCE, p’el u ts’o’okol FILH, ts’o’okole’ le je’elo’, tu ya’alaj, “yaan u mu’uk’ankúunsik múul meyaj yéetel áantaj ichil le noj lu’umo’oba’, ti’al u tóoch’ta’al xan miatsil.
Edición: Ana Ordaz
