Comité Nacional para la Vigilancia Epidemiológica (Conave) tu ts'áaj k'ajóoltbil jump'éel éepidemiolojiikoil k'a'aytajil ichil tuláakal u kúuchilo'ob ts'aakankil yaan u yáax, ka'a yéetel óox niibelil meyaj, beyxan ichil Unidades de Vigilancia Epidemiológica Hospitalaria (UVEH), máaxo'ob táaka'an ichil Red Nacional de Laboratorios de Salud Pública, tumen táan u ts'u'uytal u tsa'ayal hepatitis ma' ojéela'an tu'ux u taali', ts'o'okole' yáax máaxo'ob k'oja'anchaje' jts'a'ab ojéeltbil tumen Reino Unido tu táan Organización Mundial de la Salud (OMS) le 5 ti' abril máaniko'.
Conavee' tu ts'áaj k'ajóoltbile' tak le 21 ti' abril máaniko' ojéelta'ab yanchaj kex 169 u túul paalal 16 u ja'abile', tsa'ay ti' le k'oja'anila', ti' 12 u p'éel noj lu'umilo'ob, tu'ux ma' táaka'an Méxicoi'. Ojéelta'ab yanchaj: Reino Unido (114), España (13), Israel (12), Estados Unidos de América (9), Dinamarca (6), Irlanda (5), Países Bajos (4), Italia (4), Noruega (2), Francia (2), Rumanía (1) yéetel Bélgica (1).
También te puede interesar: Emite México aviso por casos de hepatitis desconocida en menores
Ba'ale', Argentinae' tu' ts'áaj k'ajóoltbil le' jueves máanika', yanchaj juntúul paal, waxakp'éel u ja'abile', máax ti' tsa'ay le' k'oja'anilo' yéetel ma' ojéelta'an tu'ux u taali', ka'alikile' u jala'achilo'ob Panamae' táan xan u máan u xak'alto'ob wa tsaayal xan ti' juntúul paal te'elo'.
Ichil ba'ax jts'a'ab k'ajóoltbil tumen Conavee', ti' 20 u túul máax tsaayal k'oja'anil ti' táatanxel lu'umilo'obe' "ts'o'ok u yila'ale' yaan xan u biirusil SARS-CoV-2. U ya'abil máaxo'ob tsaayal tio'obe' ojéela'an ma' ts'a'aba'an ti'ob u báakunail Covid-19i'. Máaxo'ob ila'an k'oja'anobe' yaan ti'ob hepatitis aguda con transaminasas (AST o ALT) ts'o'okole' jach táaj ka'anchaja'an”.
U ya'abil máaxo'ob k'oja'anobe', ku ya'alik u jo'olpóopilo'ob toj óolale', tu ye'esajo'ob yaan ictericia, beeyxan u chíikulal e'esik gastrointestinales (tu'ux táaka'an abdominal yajil, waach'alil yéetel xej), ba'ale' mix ti' juntúul tsa'ay chokwili'. "Mix máak e'es wa paak'al ti'ob u biirusil hepatitis A, B, C, D yéetel E. Jejeláas bix u bin u k'éexel ba'al tu toj óolalo'ob, yéetel tak walkila' u 10 por siientoile' ts'o'ok u k'a'abeetkúunsik u ts'a'abal u jeel iigadoil".
Beyxan ti' tuláakal máax ojéela'an tsa'aye', ila'abe' yaan adenovirus ti' 74 u túulal; 18 ti' le' je'elo'obo' ojéela'an jatsa'an yéetel k'ajóolta'an beey F tipo 41. "Tak walkila' ma' ojéela'an tu'ux u taal le k'oja'anilo', ba'ale', táan u jach xaak'alta'al le yaan ba'al u yil yéetel adenoviruso'”, ku xo'okol te'el ts'íibo'.
Xak'alutskíinsa'an tumen: Sasil Sánchez Chan
