U noj kaajil Jo’e’, chíimpolta’an beey Ciudad Creativa en Gastronomía tumen UNESCO. Ma’ táan u xáantal kéen beeta’ak u cha’anil Pueblos del Maíz 2022, yéetele’ ku kaxta’al u péektsilta’al janalo’ob suuk u beeta’al tu péetlu’umil Yucatán, ba’ale’ beyxan u táakmuk’ta’al meyajo’ob ku beeta’al ti’al u yantal náajalil yéetel u kóojol uláak’ máako’ob u xíimbalto’ob le lu’uma’. Cha’ane’ yaan u beeta’al 13 yéetel 14 ti’ mayo, tu baantail Ermita de Santa Isabel yéetel San Sebastián.
“Úuchik u ts’a’abal u chíimpolalil Ciudad Creativa en Gastronomía táan u beeta’al meyajo’ob ti’al u yantal máax xíimbaltik yéetel k’ajóoltik janalo’ob yaan te’e lu’uma’ tsikbalta’ab.
Yaan uláak’ kaajo’ob chíimpolta’anob yéetel le k’aaba’ je’elo’, ichilo’obe’ ti’ yaan Tucson, Arizona; Jo’, Yucatán; San Antonio, Texas yéetel Puebla, Puebla. Leti’obe’ táan xan u táakmuk’tiko’ob meyaj ku beeta’al ti’al u tóoch’ta’al u ba’ax ku beeta’al tumen u meyajnáalo’ob tu kaajilo’obi’, beyxan ajbeet janalo’ob yéetel kolnáalo’ob.
También te puede interesar: Mérida celebrará su gastronomía en el festival Pueblos de Maíz 2022
Tu kaajil Jo’e’, yaan u k’a’amal Corredor Gastronómico Callejero tu múuch’kajtalil Ermita de Santa Isabel yéetel San Sebastián; yaan u mu’uch’ul manal 30 u túul máax kéen u ye’es ba’ax ku meyajtik ti’al jaantbil, yaan u beeta’al tsikbalo’ob, cha’ano’ob yéetel u jejeláasil ba’al yaan u yil yéetel ixi’im.
Ichil ba’ax yaan u páajtal u cha’antale’ ti’ yaan: u paax u múuch’il “La Siembra” yéetel “Trovadoras del Mayab”, u cha’anil “Journey into Yucatán” beeta’an tumen Symphonic Planet; u múuch’ óok’otil yéetel paax Ayuntamiento de Mérida; u ye’esajil oochelo’ob “Tiempos de Milpa”; u yáalkabta’al k’a’anan múuch’kajtalo’ob te’e noj kaaja’ jo’olbesa’an tumen Camino del Mayab yéetel tsikbalo’ob yaan ba’al u yil yéetel ixi’im beeta’an tumen Colectivo Guardianes de las Semillas, Traspatio Maya yéetel Kool Kab.
Le meyaja’ káaj u tukulta’al u beeta’al ka’aj yanchaj Tianguis Turístico 2019, tu’ux kaxta’ab ka múul meyajnak kaajo’ob táakmuk’tik náajal, xíinximbalil yéetel miatsil.
Corredor Gastronómico Callejero yaan u beeta’al tu súutukil 5 tu taal u chíinil k’iin, tak 11 áak’ab. Ti’al u yojéelta’al uláak’ ba’alo’ob yóok’lale’, ku páajtal u xak’alta’al: www.visitmerida.mx/PueblosMaiz
Xak'alutskíinsa'an tumen: Sasil Sánchez Chan
