de

del

Foto: José Antonio López

U kajnáalilo’ob Solidaridade’ bino’ob jo’oljeak jueves tak Ciudad de México ti’al u ts’áako’ob ojéeltbil tu táan u jejeláasil kúuchilo’ob jala’ache’, ma’ ki’imak u yóolo’ob yéetel meyaj ku beeta’al te’e méek’tankaajo’ tumen u mola’ayilo’ob Calica, Cadu yéetel ABC, ts’o’okole’ tu k’áatajo’ob xan ka jéets’ek ba’al yaan u yil yéetel k’áax u ti’al máasewal kaajo’ob.

Máax jo’olbesik u múuch’kabil Vecinos Unidos, Marcos Antonio López Díaz, tu tsikbaltaje’, tu xíimbalto’ob Palacio Nacional, Senado, Cámara de Diputados yéetel Embajada de Estados Unidos ti’al u líik’sik u t’aano’ob tu táan Calica, tumen -tu ya’alaje’- jump’éel mola’ay ts’o’ok u seen k’askúuntik u kaajil Solidaridad.

Tu tsikbaltaje’ te’e líik’sajil t’aano’ táakpaj máaxo’ob chíikbesik u máasewal kaajilo’ob Quintana Roo, máaxo’ob u k’áato’ob ka yanak u k’e’exel a’almajt’aan yóok’lal bix u ti’alinta’ak lu’um, ti’al xan u k’éexel bix u k’a’abéetkunsa’al ti’al meyaj. 

 

También te puede interesar: Playenses protestan contra Calica en Palacio Nacional

 

Tu tsikbaltaj xane’, táan u k’áatiko’ob ka yanak u xo’okol kaaj, ti’al u yojéelta’al jaytúul máak ti’alintik k’áax u ti’al, tumen tu jo’oloj 20 jaabo’obe’ ma’ béeyak u ts’a’abal u ju’unilo’ob ti’ob, ts’o’okole’ jach ko’oj le bajux ku k’áata’al ti’ob ti’al u béeytal u k’u’ubul ti’ob.

“Tuláakal máasewal kaajo’obe’ jach ich óotsilil kaja’an, mina’an mix sáasil, mix uk’be’en ja’, mix u kisbuuts’il u bin wa u jóok’ol máak, ts’o’okole’ jach k’a’abéet ka ts’aatáantak tuláakal kaajo’ob, ma’ chéen kéen náats’ak u k’iinilo’ob yéeytambal. Táan k k’áatik ti’ máaxo’ob oka’an u báaxto’ob poliitikae’, kéen k’cuhuk je’el máaxak ti’ leti’ob u beet u jala’achile’, ka meyajnak yóok’lal le kaajo’oba’”, tu ya’alaj López Díaz.  

Tu k’áataj ti’ uláak’ máaxo’ob ku meyajo’ob ti’al u kaláanta’al k’áaxe’, ka u líik’so’ob u t’aan xan tu táan Calica, Cadu yéetel blokeeras je’el bix ABC, tumen táan u jach k’askúuntiko’ob u miilesil ektaareas k’áax ti’al u béeytal u beeta’al “favelas Villa del Sol, ts’o’okole’ ma’ tu ch’éenel u k’askúuntiko’ob yóok’ol kaab”.

Tu ts’ooke’, tu tsikbaltaje’, ma’alob bin úuchik u k’a’amalo’ob tumen mola’ayob tu’ux bino’ob, máax yéetel mantats’ kun tsikbalo’ob ti’al u yila’al ba’ax je’el u páajtal u beeta’al yóok’lal le báax táan u k’áatik kajnáalo’ob.

Xak'alutskíinsa'an tumen: Sasil Sánchez Chan