Le 28 ti’ mayo ku taala’ yaan u beeta’al u cha’anil Noche Blanca, tu noj kaajil Jo’, le beetike’ yaan u beeta’al jejeláas e’esajilo’ob yéetel meyajo’ob ich maayat’aan. öoli’ 15 u p’éel meyajo’ob yéetel kaambalo’ob yaan u beeta’al tu paarkeil La Ermita, beey úuchik u k’a’aytal tumen máax jo’olbesik Cultura, Irving Berlín Villafaña.
U mola’ayil Instituto Municipal para el Fortalecimiento de la Cultura Maya yaan u beetik jejeláas meyajo’ob te’e k’iino’; láas 8 áak’ab kéen káajsa’ak tuláakal ba’al.
Yaan u xo’okol ik’il t’aano’ob, yaan xan u k’a’ayal rap yéetel uláak’ paaxo’ob, yaan u báaxta’al lóoterya yéetel yaan u beeta’al u ye’esajil maaya najo’ob. Tuláakal e’esajilo’ob yéetel meyajo’obe’ tak chúumuk áak’ab kéen ts’o’okok.
“Lalaj oora kéen yanak jump’éel e’esajil; paax, t’aan, tsikbal yéetel uláak’ ba’alo’ob tu’ux yaan u yu’ubal le maayat’aano’”, tu ya’alaj Berlín Villafaña.
“Jach ki’imak k-óol yéetel le meyaja’, tumen u kúuchil u ka’ansal maayat’aane’ ma’ chéen ti’al u ye’esal, ti’al xan u t’a’anal, beyxan ti’al u yúuchul tsikbal yéetel ti’al u yantal u jejeláasil tuukulo’ob”, tu ya’alaj.
También te puede interesar: La lengua maya estará presente en la Noche Blanca
Irving Berlíne’ tu ka’ajsaj t’aan ma’atech u t’a’anale’ ku kíimil, le beetik jach táaj k’a’anan ka yanak uláak’ máaxo’ob t’anik yéetel ts’íibtik maaya ti’ meyajo’ob je’el bix Noche Blanca, ti’al u ch’a’ak u muuk’ xan yéetel.
Te’e ja’aba’, leti’e’ yáax kéen táakbesa’ak Instituto Municipal para el Fortalecimiento de la Cultura Maya ichil u k’iimbesjail Noche Blanca, le beetik yaan u táakbesa’al maayai’.
Ichil jayp’éel ba’al yaan u beeta’al te’e áak’abo’, yaan u páajtal u cha’anta’al u balts’amil yóok’lal Óok’ostaj Pool, tumen u xoknáalilo’ob Instituto, xma’ bo’olil u cha’anta’al yéetel láas 10 áak’ab kéen káajsa’ak; yaan u yu’uba’al Múul Paax, k’aayo’ob ich maaya, láayli’ xma’ bo’olili’, yéetel láas 11 kéen káajak; u paaxil rap, kuumbia, hip hop yéetel uláak’o’obe’ yaan u káajal láas 12 chúumuk áak’ab. Tuláakal le je’ela’ ti’ kun úuchul tu paarkeil La Ermita de Santa Isabel.
Te’e ja’abila’, u óoxlajuntéen u beeta’al Noche Blanca yéetel yaan xan u beeta’al uláak’ meyajilo’ob ti’ uláak’ paarkes je’el bix Barrio de San Juan, Barrio de Santa Ana, Barrio de La Mejorada, ichil uláak’o’ob.
Xak'alutskíinsa'an tumen: Sasil Sánchez Chan
