Jala’ach Miguel Ángel Navarro Quintero yaan u péek ti’al u ts’aatáantik u yutsil u péetlu’umil Nayarit, le beetike’ yaan u kaláantik tuláakal u k’áaxil le lu’um táan u ba’atelta’alo’, “ts’o’okole’ ma’ táan u cha’ik, ka to’okok u k’áax nayaritailo’ob, mix xan u máasewal kaajilo’obi’, kex je’el beyka’aj poliitikóo talamil ka yanak”, tu ya’alaj u meyajnáalil Jala’ach, Juan Echeagaray Becerra.
U jala’achil u noj lu’umil México, Andrés Manuel López Obrador, tu much’ajubáaj yéetel jun jaats wixárika máak ti’ u kaajilo’ob San Sebastián Tuxpan y Mezquitic, Jalisco, tu kúuchil Palacio Nacional, tu’ux tu k’ubaj u t’aan ti’al u ya’alike’, yaan u ts’aatáantik ba’atel yaan yóok’lal k’áaxo’ob yéetel wakaxnáalo’ob yaan tu péetlu’umil Nayarit, tu’ux táaka’an maanal 11 mil ektaareas.
También te puede interesar: Gobierno de Nayarit dice que no cederá terreno en disputa de los wixárikas
Echeagaray Becerrae’, tu ya’alaj yaan jayp’éel ba’alob yóok’lal k’áax úuch káajak u tsikbalta’al te’e tribunaalo’obo’, yéetel yaane’ ts’o’ok maanal 60 ja’abo’ob káajak u ba’atelta’al ichil u máasewal máakilo’ob Jalisco yéetel u wakaxnáalilo’ob u méek’tankaajilo’ob La Yesca, tu péetlu’umil Nayarit, tumen u ka’a múuch’il máako’obe’, u k’áat ka p’a’atak tu k’ab u ju’unil le k’áaxo’obo’.
Tu ya’alaj xane’, u jala’achil le péetlu’umo’ -jok’a’an ti’ morenistail múuch’kabile’- yaan u jach meyaj ti’al u yila’al le ba’ax a’alab tumen u jala’achil u noj lu’umil Méxicoe’ “ma’ u ch’a’abal beey poliitikóo ba’al, tumen k-ojele’ yóok’lal láak’inajil ku beeta’al ti’al u ts’aatáanta’al le talamila’, yaan u táakbesikubáah u jala’achil u péetlu’umil Jalisco, tumen ts’o’ok u máan ya’abach ja’ab káajal u ba’ateltal le k’áaxo’oba’”.
Xak'alutskíinsa'an tumen: Sasil Sánchez Chan
