Te’e ja’aba’ yaan uláak’ taak’in jóok’sa’an ti’al u beeta’al u bejil u máan t’íinchak balak’ ook tu noj kaajil Jo’; óoxp’éel kiloometróos kun beetbil tu xaman-lak’inil le noj kaajo’, beey úuchik u k’a’ayta’al tumen máax jo’olbesik Instituto de Movilidad y Desarrollo Urbano Territorial (IMDUT), Rafael Hernández Kotasek.
Beyxan tu ya’alaje’ yaan u beeta’al u múuch’il Consejo de Bicicleta, ti’al u xak’alta’al tu’ux baantailo’ob le kaajo’ k’a’abéet u séeba’an beeta’al uláak’ bejo’ob u ti’al.
Ikil túun u kaxta’al u péektsilta’al u asab k’a’abéetkunsa’al t’íinchak balak’ ooke’, meyajnáale’ tu tsikbaltaj xane’, le túumben kis buuts’o’ob yaan u káajal u meyaj ichil u nu’ukbesajil Va y Vene’ yaan u ts’a’abal ti’ob u nu’ukulil u na’aksa’al le bíisikleetaso’, yéetel yaan xan u beeta’al jump’éel túuntaj nu’ukbesaj ti’al k’a’abéetkunsa’al t’íinchak balak’ ook ich kaaj, ba’ale’ lelo’ yaan u beeta’al yéetel áaplikaasyon.
Leti’e’ ja’ab máanik ka’aj káaj u beeta’al u nu’ukbesajil Plan de Infraestructura de Ciclovías, tu’ux beeta’ab 71.7 kilometróos u bejil u máan biikláa, tu’ux k’a’abéetkúunsa’ab 111 miyoonesil pesos.
También te puede interesar: En Yucatán construirán tres km más de ciclovías en el norponiente de Mérida
Hernández Kotaseke’ tu ch’a’achibtaj u k’a’ananil t’íinchak balak’ ook ti’al u máan máak, le beetik unaj u ya’abta’al máax ch’a’ak u ti’al tumen “je’el beyka’aj ka nojochkíinsa’ak bejo’obe’, kéen máanak jayp’éel ja’abo’obe’ yaan u p’áatal chochobkil le kaajo’”.
Bej kun beetbil te’e ja’aba’, yaan u beeta’al ti’al u nupa’al 15 kms ichil Paseo Verde yéetel Paseo Henequenes, tu’ux yaan u táakbesa’al u múuch’kajtalilo’ob Francisco de Montejo tak Diamente Opichén, táan u ts’o’oksa’al u éejekutiboil meyaj walkila’; ma’ xane’, wa ti’al u ts’o’okbal le ja’aba’, yaan u ts’o’oksa’al le bejo’oba’.
Ti’al u winalil julio kéen k’a’ayta’ak u páayt’anil ti’al u kaxta’al ba’ax mola’ayil kun beetik le bejo’; meyaj tukulta’an u xáantal óoxp’éel winalo’ob.
Uláak’ ba’ax tsikbalta’ab tumen Hernández Kotaseke’ leti’e’ noj tsikbalil ts’o’ok u káajal u yantal ti’al u patjo’oltal u túumben a’almajt’aanil Ley de Movilidad tu péetlu’umil Yucatán,
Uláak’ ba’ax kun beetbil ti’al u péektsila’al t’íinchak balak’ ooke’, ikil táan xan u beet’aal Smart City Expo LATAM, tu k’iinil 14 tak 16 ti’ junioe’, yaan u beeta’al jump’éel e’esajil tu kúuchil Gran Museo del Mundo Maya yéetel yaan u ts’a’abal u mooduloil Movilidad Amigable ti’al u tsikbalta’al ti’ kaaj ba’ax u yutsil u k’a’abéetkunsa’al le nu’ukula’.
Xak'alutskíinsa'an tumen: Sasil Sánchez Chan
