Je'el bix ts'o'ok u bin u ya'abtal u k'a'abéetkunsa'al t’íinchak balak’ ook tu méek’tankaajil Tulume’, beyxan ts’o’ok u ya’abtal u yokolta’al, le beetik kaaje’ ku máansik jayp’éel talamilo’ob; máaxo’ob ku yokolta’ale’ ku ya’aliko’ob kex tumen ku beetiko’ob u tak poolil tu táan Fiscalía General del Estado, ma’ táan u máan xak’altbil wa ba’ax yóok’lal yéetel ma’ táan u su’utul mix jump’éel ti’ le okolta’ano’.
Yóok’lale’, j-íijenieróo Arturo Ramírez Cordero, máax beetik u jeerenteil áarrendadooráa Ibike Tulum, tu tsikbaltaje’ ts’o’ok lajunp’éel ja’ab káajak u meyaj te’elo’, ts’o’okole’ jach chika’an úuchik u ya’abtal ookol ku beeta’al te’e ts’ook ja’abo’oba’. Walkil ka’ap’éel ja’ab paachile’, chéen ka’ap’éel t’íinchak balak’ ook ku yokolta’al tu jach ya’abil ti’ jump’éel ja’ab, ba’ale’ walkila’ yaan kex kamp’éel ku yokolta’al ichil jump’éel winal.
“Yóok’lal ookol táan u seen yantale’, tin tsikbaltik yéetel uláak’ máako’ob láayli’ majan t’íinchak balak’ ook ku beetiko’obe’, beyxan u tuukulo’ob: ts’o’ok u jach ya’abtal ookol ti’ le ts’ook ja’abo’oba’. Te’el tu’ux kmeyaja’, ka’ache’ chéen ka’ap’éel ku yokolta’al ti’ jump’éel ja’ab, ba’ale’ walkila’ tak kamp’éel ichil jump’éel winal”, tu yaj óoltaj.
También te puede interesar: Se multiplica el robo de bicicletas, ante la indiferencia de la autoridad
Tu ya’alaje’ u seen úuchul le je’ela’ ku beetik k’aas ti’ u yuumilo’ob mola’ay yéetel ti’ kaaj, tumen ts’o’ok u p’áata’ale’ mix taak u maniko’ob mix jump’éel túumben t’íinchak balak’ ook tumen sajko’ob u ka’a ch’a’abal ti’ob. Yóok’lale’, ku ma’anal u jeelo’ob kex ma’ túumbentako’obi’, chéen ba’axe’ yaan k’iine’ ma’ ojéela’an tu’ux u taali’.
“Ku tukulta’ale’, ba’ax ti’al ku ma’anal jump’éel túumben t’íinchak balak’ ook wa yaan u yokolta’al, le beetike’ kex ma’ túumbene’ ku ma’anal uláak’ tu’ux, k’ex chan k’aas, maas ma’alo’ob u yila’al tumen beyo’ ma’ táan u ch’a’abal. Chéen ba’axe’, yaan k’iine’ ma’ ojéela’an wa ma’ okoltbil úuchik u beeta’ali’. Yaan máake’ ku bonik le bix kun béeytale’, ts’o’okole’ ku ka’a koniko’ob ba’ale’ kex óoxtéen u tojol”, tu tsikbaltaj.
Beey túuno’, tu tsikbaltaje’, mola’ayob majáantik t’íinchak balak’ ooke’ jejeláas u maarkasil, yéetel yaan jejeláas bix u k’ajóolta’al máakalmáak u ti’alo’obi’, le beetike’ yaan k’iine’ ku páajtal u su’utul ti’ob wa jayp’éeli’, tumen yaan ti’ob u ju’unilo’obi’.
Xak'alutskíinsa'an tumen: Sasil Sánchez Chan
