Táankelemo’ob, ti’ u péetlu’umil Quintana Roo, suuka’an u beetiko’ob depoortée’ ts’o’ok u béeykunsiko’ob maanal 110 u p’éel medaayao’ob ka’alikil táan Juegos Conade 2022, ts’o’okole’ láayli’ p’aatal ichil le yáax jo’op’éel lu’umo’ob tu’uax asab yaan náajalta’an ichil tuláakal u lu’umil México.
Te’e ts’ook k’iino’oba’, ajbáaxalo’obe’ ki’imak óolta’abob tumen jala’ach Carlos Joaquín, máax tu ts’íibtaje’, ba’ax béeykunsa’ab tumen táankelemo’obe’ “noj ba’al ti’al deportée ku beeta’al te’e péetlu’umo’”.
Adrián Chan, máax ku ba’atel ichil u keetil Luchas Grecorromanas, beeta’ab tu kaajil Mexicali, Baja California, tu náajaltaj ooróo, ka’alikil bronsée’ béeykunsa’ab tumen Divad Castro. Beyxan, u jaats máaxo’ob tu ketajubáajo’ob ti’al Luchas Asociadas de Quintana Roo, tu’ux táaka’an xi’ipalal, xch’úupalal yéetel Grecorromanae’, náajalta’ab ka’ap’éel ooróo, kamp’éel plaata yéetel ukp’éel broonsée, ti’al beyo’ u chúukpajal 13 medaayáas.
También te puede interesar: Acumula QRoo más de 110 medallas en los Juegos Conade 2022
Beyxan, tu péetlu’umil Hermosilloe’, x-cozumelil Zulema Ramírez tu náajaltaj óoxp’éel u medayasil ooróo yéetel uláak’ ka’ap’éel plaata; yanchaj u jeel béeykunsa’ab tumen Roberto Sarti tu keetil arkóo recurbóo ti’al xiib, tu jaatsil Sub-16. Ti’ le keetila’, yanchaj óoxp’éel ooróo yéetel ka’ap’éel plaata.
Ba’ale’, u asab ya’abil medaayas náajalta’ane’, yanchaj tu keetil Báab, tumen béeykunsa’ab 16 u p’éel ooróo, 17 plaata yéetel kamp’éel bronsée. Keetilo’obe’ beeta’ab tu kúuchil Centro de Alto Rendimiento tu noj kaajil Tijuana, Baja California.
“Yáax juntéen u náajalta’al le beyka’aj medaayasil tumen u péetlu’umil Quintana Roo, ma’ tuláakal tu’ux ku béeytal ba’al beyo’, ts’o’okole’ walkila’ ts’o’ok kbéeykunsik”, tu ya’alaj Christian García Gutiérrez, máax jo’olbesik u múuch’kabil Asociación de Nadadores de Quintana Roo.
Te’e k’iino’obo’, báaxalnaj u múuch’il Fútbol Femenil yéetel Béisbol, ba’ale’ ma’ yanchaj mix jump’éel medaayail náajalta’ab.
Xak'alutskíinsa'an tumen: Sasil Sánchez Chan
