Te’el k’iino’oba’ chúunsa’ab u meyajil Pabellón de Rehabilitación Pulmonar Post Covid-19, ku taal u beeta’al tumen Sistema DIF Quintana Roo. Le je’ela’ jump’éel kúuchil ku meyaj yéetel túumben nu’ukulo’ob, yéetel jach mina’an u jeel je’el bix le je’elo’ tu noj lu’umil México ti’al u yutsil kaaj, tumen te’elo’ yaan u ts’aatáanta’al máaxo’ob tsa’ay Covid-19 yéetel p’áat wa ba’ax tu wíinkilalo’obi’. Le beetike’ yaan u yantal u páajtalil u ch’a’ak u yóolo’ob tuka’atéen tu jo’oloj u máanso’ob le k’oja’anilo’.
Kúuchile’ ti’ ts’a’aban meyaj Centro de Rehabilitación Integral de Quintana Roo (CRIQ) tu noj kaajil Chetumal. Béeychaj u ts’a’abal tumen péeksa’ab u ju’unil yéetel k’áata’ab ka yanak, tumen máax jo’olbesik Sistema Estatal DIF Quintana Roo, Gaby Rejón de Joaquín, ti’al ka yanak nu’ukul k’a’abéet ti’al u yáanta’al máak ti’al u p’atik u xiixil u k’oja’anil Covid-19.
También te puede interesar: Estrena QRoo Pabellón de Rehabilitación Pulmonar Post Covid-19
U kúuchil Pabellón de Rehabilitación Pulmonar Post Covid-19, ku meyaj yéetel nu’ukulo’ob ku séeb e’esiko’ob u xiixel k’oja’an tu pulmoon máak beyxan ti’ bix u ch’a’ak u yiik’ máak kéen tsa’ayak ti’ SarsCov-2, le beetike’ yaan u páajtal xan u ts’a’abal óoxijenoteraapia ti’ jump’éel kaamaráa hiperbárica, ba’ale’ yáax táanile’ beeta’an u xaak’alil tumen u kúuchil Andrés Urrea Palma, yaan tu kaajil Santiago, tu noj lu’umil Chile, ti’al beyo’ u chéejsa’al u chuupil u pulmoon máak, yéetel u luk’sa’al u xiixel u k’oja’anil Covid19.
“Meyaje’ túumben, ts’o’okole’ mina’an u jeel je’el bix le je’elo’ ichil tuláakal u noj lu’umil México, tumen yaan u ts’aatáanta’al máak yéetel fíisioterapia, ba’ale’ yaan xan u k’a’abéetkunsa’al jump’éel cháalekóo ku tíitikubáaj, ti’al u yéets’tik se’en, tumen yéetele’ yaan u páajtal u luk’sa’al le se’en p’aatal tu wíinkilal máako’; beyxan yaan u beeta’al jump’éel nu’ukbesaj ti’al u nu’ukta’al u péeksik u wíinkilal máak, ba’ale’ u noj ba’alile’ tumen yaan u beeta’al ich ja’, ti’al beyo’ u chan jéets’el u wíinkilal máak”, a’alab utmen mola’ay ti’ jump’éel k’a’aytajil ts’íib tu beetaj.
Unaj u ya’alale’, u séeb ts’aatáanta’al u luk’sa’al u yalabil le k’oja’anil tu wíinkilal máako’, jach k’a’anan, le beetike’ Pabellón de Rehabilitación Pulmonar Post Covid-19 je’ek’ab ti’al tuláakal máak, ba’ale’ beyxan ti’al máaxo’ob ts’o’okili’ u yáax ojéeltiko’ob ba’ax najmal u beetiko’ob tumen a’alan ti’ob tumen u mola’ayil toj óolal.
Ti’al u yojéelta’al uláak’ ba’alo’ob yóok’lale’, kaaje’ ku páajtal u bin lunes tak viernes, láas 8 ja’atskab k’iin, tak láas 2 tu taal u chíinil k’iine’, tu kúuchil CRIQ, yana tu kaajil Chetumal, wa ma’e’ u yúuchul t’aan 983 12 71212.
Xak'alutskíinsa'an tumen: Sasil Sánchez Chan
