Le lunes 27 ti’ junio máanika’, tu lu’umil Quintana Rooe’ jnáak 100 mil 42 u túul máax ti’ tsaayal Covid-19, le je’ela’ u k’áat u ya’ale’, jo’oljeake’ yanchaj uláak’ 691 maanal ti’ le yanchaj domingo. Tu ts’ook kamp’éel k’iino’ob, te’e péetlu’umo’, máan 600 u túul máax ti’ tsa’ay ti’ le k’oja’anila’, ts’o’okole’ táan u káajal u chíikpajal tumen tu ya’abtal xan máaxo’ob k’áatik jayp’éel k’iino’ob tu táan Instituto Mexicano del Seguro Social (IMSS) ti’al u ma’ u bino’ob meyaj.
Tu ja’atskab k’iinil le lunes máanika’, chochobkil u kúuchil ts’akyaj IMSS yaan tu k’íiwikil Playa del Carmen ti’al u k’áata’al u ju’unil tu’ux ku je’ets’el u yantal ti’ máak jayp’éel k’iino’ob ti’al ma’ u bino’ob meyaj, úuchik u tsa’ayal ti’ob Covid. Beyxan yaan uláak’ jun jaats máake’ biinja’an ti’al u beeta’al ti’ le pruuebao’ tumen yaan ba’ax ts’o’ok u káajal u yu’ubiko’ob.
“Taalen u ch’a’a u ju’unil ti’al ma’ in bin meyaj. Láas 9 ja’atskab k’iin in wokol, ba’ale’ tin k’áataj ka cha’abak in k’uchul taardée”, tu ya’alaj Leidy, máax ku meyaj ti’ jump’éel otel yaan te’e Riviera Mayao’.
También te puede interesar: Alza en casos de Covid-19 en Quintana Roo ya se refleja en incapacidades
Tu tsikbaltaj xane’ chuka’an u báakuna, tumen beey u k’áatal ti’ te’el tu’ux ku meyajo’, ba’ale’ wa ka je’ets’ek leti’ yaan ti’e’, u ka’apuul kun tsa’ayal ti’ le k’oja’anilo’. Je’el bix leti’o’ yanchaj uláak’ máak a’ale’, ku tukultiko’ob Covide’ ts’o’ok ka’ach u p’áatal paachil, yéetel jak’a’an u yóolo’ob tumen tu ka’a piimtal.
Secretaría de Salud (Sesa) ti’ u péetlu’umil Quintana Roo tu ya’alaj le domingo máanika’, 25 ti’ junioe’, yanchaj 621 u túul máax ti’ tsa’ay Covid-19; sábado 24e’ yanchaj 803 yéetel viernes 23, 601 u túul uláak’. Beyxan yaan 49 u túul oksa’an tu kúuchul ts’ak yaj yéetel 5 mil 922 u túulale’ u k’almubáaj tu yotoch.
Máax jo’olbesik Sesa, Alejandra Aguirre Crespoe’ tu páayt’antaj kaaj ti’al u k’áatik ka u ts’áaj u pixchi’, yéetel u maas bin máak tu’ux chan pikta’an tumen iik’ wa táankab u beeta’al, beyxan u p’o’ok máak mantats’ u k’ab
Uláak’ ba’ax tu k’áataje’, leti’ ma’ u ts’akikubáaj máak chéen tu juunal wa ku yu’ubik beey yaan ba’ax ku tsa’ayal ti’, “maas ma’alob ka xi’ik máak yiknal ts’akyaj, yéetel wa ku je’ets’el leti’e’ Covid-19 tsaayal ti’o’, ka u jatsubáaj máak ti’ uláak’o’ob”.
Xak'alutskíinsa'an tumen: Sasil Sánchez Chan
