Máax beetik u súubsekretarioil Seguridad Pública, Ricardo Mejía Berdeja, tu ts’áaj k’ajóoltbile’ béeychaj u juta’al junjaats múuch’il konik ka’ach u sexual meyaj paalal tu péetlu’umil Quintana Roo, beyxan a’alabe’ jma’ach máax jo’olbesik múuch’ yéetel toka’ab waktúul meken paalal.
Tu tsoolil meyaj k’a’ayta’ab ti’ u tse’ekil jala’ach ja’atskab k’iine’, u jala’achil u noj lu’umil Méxicoe’, Andrés Manuel López Obrador, t’aanaj Mejía Berdeja ti’al u ts’áak k’ajóoltbile’ macha’ab Javier N., máax ku tukulta’al jo’olbesik u múuch’il k’aba’inta’an Cuatro Caminos, tu’ux táaka’an jun jaats máako’ob ku máan u kono’ob sexual meyaj ku beeta’al tumen mejen paalal. Le je’elo’ béeychaj tumen túuxta’ab xak’altbil jump’éel naj yaan tu méek’tankaajil Chetumal.
Xaak’ale’ beeta’ab le 21 ti’ junio máaniko’, úuchik u péek Fiscalía General del Estado (FGE) de Quintana Roo ti’al u yokol ti’ jump’éel naj yaan tu baantail Flamboyanes ti’ le noj kaajo’. Ka’aj beeta’abe’ jts’a’ab k’ajóoltbile’ peritoso’obe’ tu tokajo’ob nu’ukulo’ob tu’ux líik’sa’an jejeláas ba’alob yaan u yil yéetel u póornografiail mejen paalal, uláak’ nu’ukulo’ob yéetel taak’in.
“Ka’atúul máak macha’abij, juntúul ti’ leti’obe’ táanxel kajil, ts’o’okole’ yaan u máansalo’ob tu táan Ministerio Público ti’al u je’ets’el bix táakano’ob ti’ le k’aasil meyajo’. Te’e najo’ toka’ab xan mejen paalal, ku tukulta’ale’ leti’e’ ku k’a’abéetkunsalo’ob ti’al u beeta’al ba’ax ma’ unaji’”; a’alab tumen Fiscalía te’el súutuko’.
Ichil ba’ax a’alab yóok’lal ba’ax yáax chíikpaj te’e xaak’al jts’a’ab k’ajóoltbil tumen súubsekretarioe’, beeta’ab u tak poolil ba’ax ku yúuchul tumen juntúul ko’olel, máax xan ku kona’al ti’al u beetik sexual meyaj, maanal 18 u ja’abil. Mejen paalal toka’abobe’ ma’ toj u yóolo’obi’, mix xan ku bino’ob najil xooki’. Máaxo’ob macha’abe’ p’ata’abob tu k’ab FGE yéetel paalalo’obe’ biinsa’abo’ob DIF.
Xak'alutskíinsa'an tumen: Sasil Sánchez Chan
