U mola’ayil Instituto Nacional de Transparencia, Acceso a la Información y Protección de Datos Personales (INAI) tu jets’aje’, u mola’ayil Fonature’ yaan u yantal u jach xaak’al tu beel yéetel u ts’áak k’ajóoltbil ba’ax ku yúuchul yéetel u kóontratosil kaláantik u beeta’al tuláakal u wukp’éel jaatsilo’ob bej Tren Maya.
“Tuláakal ba’ax ku beeta’al tu meyajil Tren Mayae’ táan u jach ila’al tumen kaaj, le beetik ts’o’ok u jach yantal ju’uno’ob oksa’an Plataforma Nacional de Transparencia, ti’al u k’áata’al ka sáasilkúunsa’ak wa ba’ax yóok’lal le meyajo’; tak walkila’ yaan 4 mil 616 u p’éel sóolisitudo’ob, yéetel uláak’ 18 mil 622 u rejistrosil u sáasiljunsa’al wa ba’ax ti’ kaaj (...). U taakil u yojéelta’al tumen kaaj ba’ax ku yúuchule’, jach ma’alob tumen k’a’abéet u yojéelta’al ba’ax ti’ ku xu’upul u taak’inil kaaj ts’a’aban ti’al u beeta’al le meyajo’, beyxan máax ti’ p’ata’an ti’al u yilej yéetel wa beey táan u beeta’al ba’al je’el bix jets’a’ano’”, beey tu ya’alaj Xcomisionada Norma Julieta Del Río Venegas.
También te puede interesar: Tren Maya: Fonatur deberá informar sobre contratos de supervisión de obras
Xomisionada Del Río Venegase’ tu tsolaj u ts’a’abal meyajo’obe’ jump’éel ba’al k’a’anan p’ata’an tu k’ab jala’acho’ob, tumen yéetele’ ku ts’aatáanta’al ba’alob k’a’abéet ti’ kaaj, ts’o’okole’ ma’ chéen lelo’, tumen yéetel u taak’in kaaj ku bo’ota’al, le beetike’ ma’ unaj u ta’akal mix ba’al yóok’lali’. “K-ka’a a’alik, INAI yéetel u mola’ayilo’obe’ unaj kjach p’ilik k-ich ti’al k-ilik ma’ u ta’akal mix ba’al tumen u yóox jaatsil meyaj jala’ach, mix xan u sa’atiko’ob wa ba’ax ti’al ma’ u k’a’aytiko’ob ba’al je’el bix unaje’”, tu ya’alaj.
Leti’ xane’ tu ya’alaje’, u ya’alal ba’al je’el bix unaje’, táaka’an ichil ba’axo’ob k’a’abéet u beeta’al kéen p’i’isik u meyajil jala’acho’ob yéetel bix u k’a’abéetkunsa’al taak’in yaan.
Yóok’lale’, yanchaj juntúul máak tu k’áataj ti’ Fonatur-Tren Maya, S.A., de C.V. ka u ts’a’abal k’ajóoltbil u k’aaba’ mola’ayob kaláantik u meyajilo’ob le Treno’, beyka’aj u bo’olil, ba’ax k’iin u káajal yéetel u ts’o’okol, beyxan bix yanik walkila’, ts’ets’ek ti’ u wukp’éel jaatsil le meyajo’.
Fonatur túune’, tu núukaj tu yáamil Subdirección de Escalas Náuticas yéetel Subdirección de Administraciones Portuarias Integrales, ka tu ts’áaj k’ajóoltbile’ mina’an mix ba’al yaan u yil yéetel ba’ax k’áatabo’. Le beetike’, máax oks le ju’uno’, tu k’áataj ti’ INAI ka u táakbesubáaj ti’al u yila’al ka sáasilkunsa’ak ba’ax ku k’áatiko’.
Xcomisionada Norma Julieta del Río Venegas, tu ya’alaj túune’, kex Fonatur tu túuxtaj k’áatbil ka núuka’ak ba’ax ku k’áata’ale’, ma’ beetchaj ba’al je’el bix unaje’.
Yóok’lal ba’alob je’el bix le je’elo’, a’alabe’ k’a’anan u yila’al ka meyajnak mola’ayo’ob je’el bix unaje’, tumen Tren Mayae’ jump’éel meyaj táan u t’u’ulpachta’al tumen ya’abach máak, le beetik najmal u sáasilchajal tuláakal ba’ax ku yúuchul yéetel.
Xak'alutskíinsa'an tumen: Sasil Sánchez Chan
