Ikil u kaxta’al ma’ u yúuchul loob ti’ mix máak tu k’iinilob je’elil ts’o’ok u káajale’, chúunbsa’ab jo’oljeak, tu méek’tankaajil Solidaridad, u nu’ukbesajil Plan Operativo de Verano táan u múul beeta’al yéetel u jala’achil le méek’tankaajo’ (jo’olbesa’an tumen Lili Campos), tu’ux táaka’an xan u mola’ayilo’ob u yóox jaatsil jala’ach, ti’al beyo’ u ts’aatáanta’al yéetel u kaláanta’al máaxo’ob yaan te’e kaajo’.
Ti’al u chíikbesa’al táakpaj Lili Campos, t’aanaj máax beetik u séekretaaryoil jéeneral le áayuntamientoo’, Juan Novelo Zapata, tu’ux tu ya’alaje’ yaan u yóolo’ob meyaj ti’al u mu’uk’ankúunsa’al ba’ax ku beeta’al ti’al u kaláanta’al kajnáalo’ob, je’el bix xan máaxo’ob ku kóojolo’ob xíinximbal te’elo’. Tu ts’ája k’ajóoltbil xane’, otelo’obe’ óol ts’o’ok u láaj chu’upulo’ob.
También te puede interesar: Dan banderazo al Plan Operativo de Verano 2022 en Playa del Carmen
Orlando Flores Sánchez, u meyajnáalil Protección Civil, Prevención de Riesgos yéetel Bomberose’, tu ya’alaj ts’a’aban meyaj 591 u túul ajkanan kaajo’ob, wakp’éel áambulaansias, 55 u p’éel unidaadées, kamp’éel piipas, 16 kúuatrimotos yéetel 24 motóos, ti’al u máan u k’iinilo’ob je’elil tu beel, xma’ sajbe’entsilil.
Flores Campose’, tu jets’aj u nu’ukbesajil Plan Operativo de Verano ku ts’áak u páajtalil u yila’al ma’ u yantal mix ba’al p’atik ich sajbe’entsil kaaj, yéetel xan ti’al ma’ u noj ba’altal wa ba’ax ka k’uchuk úuchul te’elo’. “U mola’ayil Secretaría de Protección Civil, Seguridad Pública y Tránsito, C5, Capitanía de Puerto, Guardia Nacional, Cruz Roja, Secretaría de Marina yéetel u múuch’ilo’ob áantaje’, ts’o’ok klíik’sikbáaj ti’al kts’aatáantik je’el ba’axake’, ti’al u yutsil máaxo’ob yano’ob te’e kaaja’”, tu tsikbaltaj.
U meyjanáalil Seguridad Pública, Raúl Alberto Tassinari, tu ya’alaje’ yaan u táanilkunsa’al u kaláanta’al le tu’ux baantail ya’ab u xíimbalta’al tumen máak. U 28 kaadetesil túumben jok’a’ano’ob ti’ u kúuchil kaambal Academia de Policía yaan u táakbesa’alob ich Policía Turística, ti’al u mu’uk’ankúunsa’al u kaláanta’al Quinta avenida, tu’ux ts’o’ok u ts’a’abal u kaamarasil kanan yéetel yaan máaxo’ob ku sutulsuuto’obi’, ti’al u yila’al ba’ax ku yúuchul te’e tu noj bejil xíimbalo’; jáal ja’e’ yaan u kaláanta’al yéetel u yáantajil kuaatrimotóos.
Beyxan, táan u ts’aatáanta’al u ts’a’abal meyaj u jeel máako’ob te’e mueeyeo’, tu bejil u yookbal máak te’e kaajo’, je’el bix xan u nu’ukbesajil Centinela, ti’al u kaláanta’al bix u máan kis buuts’o’obi’. Uláak’ ba’ax tu ya’alaje’, ka bin u ch’ot máak u yotoch tu beel wa ku yantal u jóok’ol, ti’al ma’ yúuchul ookoli’.
Xak'alutskíinsa'an tumen: Sasil Sánchez Chan
