Le jueves máanika’, tu jiimnasyoil Kuchil Baxal, yaan tu méek’tankaajil Cancúne’, beeta’ab u múuch’tambalil Reunión Pública del Proyecto Denominado Tren Maya Tramo 5 Norte, meyajta’ab tumen Fonatur Tren Maya S.A. de C.V., tu’ux táakpajal máaxo’ob chíikbesik u múuch’ilo’ob kaláantik yóok’ol kaab, kaambal, najilo’ob xook yéetel kaaj.
Te’e múuch’o’ jts’a’ab k’ajóoltbil jejeláas ba’alob yaan ba’al u yil yéetel u xaak’alil Manifestación de Impacto Ambiental (MIA) beeta’an ti’ jaatsil 5 Norte, le beetike’ u meyajnáalilo’ob jala’ach táakpajo’obe’ tu núukajo’ob k’áatchi’ beeta’ab tumen máaxo’ob táakpajo’obi’.
Beey túuno’, Rafael Villegas Patraca, máax tu chíikbesaj Fondo Nacional de Fomento al Turismo (Fonatur), beyxan José Luis Juan Bravo, máax jo’olbesik u xookilo’ob yéetel u politikasil kaambyo klimaatikóo yéetel manejóo éekosisteemikóo ichil u mola’ayil Secretaría de Medio Ambiente y Recursos Naturales (Semarnat), leti’e’ maáxo’ob jo’olbes le múuch’tambalo’.
Meyajnáalo’obe’ tu ya’alajo’obe’ tuláakal u meyajilo’ob Trene’ táan u beeta’al je’el bix jets’a’an ichil le a’almajt’aano’, ba’ale’ máaxo’ob chíikbesik múuch’o’ob kaláantik yóok’ol kaab yéetel u múuch’kabil Defendiendo el Derecho a un Medio Ambiente Sano, tu tak poltajo’obe’ u k’áatchi’ibta’al kaaje’ p’áat chéen beey mix ba’ale’ tumen mix táan u yu’uba’al ba’ax ku ya’alali’.
Maanal jo’op’éel ooráa xáanchaj le múuch’tambalo’. Mantats’ k’áata’ab ba’axten káajsa’ab meyajo’ob te’elo’ kex tumen ma’ili’ yanak MIA, ba’ale’ núuka’abe’, ma’ bin beey úuchik u yúuchulo’. Kex beyo’ yanchaj u jeel máako’obe’ tu ye’esajo’ob ku táakmuk’tiko’ob le Treno’.
Ichil máaxo’ob táakpaje’ ti’ yanchaj u mola’ayil Semarnat; Daniel Quesada, máax jo’olbesik Unidad Coordinadora de Vinculación Social; Alejandro Pérez Hernández, máax jo’olbesik impacto y riesgo ambiental; yéetel Silvia Montes Albino, máax jo’olbesik evaluación de proyectos gubernamentales; beyxan Rafael Villegas, Efraín Olivares Lira yéetel Alexandro Medina, ti’ u mola’ayil Fonatur, ichil uláak’o’ob.
